‘नो पार्किङ’ निर्णयले दमौली बजार तनावग्रस्त, व्यवसायी सडकमा, बजार ठप्प

काठमाण्डौं । दमौली बजार क्षेत्रमा लागू गरिएको नयाँ ‘नो पार्किङ’ नीतिविरुद्ध स्थानीय व्यवसायीहरू आक्रोशित बनेका छन् ।  

व्यास नगरपालिकाले सफा सडक क्षेत्रमा सवारी पार्किङ पूर्ण रूपमा निषेध गरेपछि व्यवसायीहरूले पसल बन्द गर्दै आन्दोलन शुरु गरेका हुन् ।

नगरपालिकाले शहरको ट्राफिक व्यवस्थापन सुधार गर्ने, सडक अतिक्रमण नियन्त्रण गर्ने तथा बजार क्षेत्रलाई व्यवस्थित र सुन्दर बनाउने उद्देश्यले नयाँ व्यवस्था लागू गरेको जनाएको छ ।

सोहीअन्तर्गत केही सडकखण्डमा एकतर्फी सवारी सञ्चालनको नियम पनि कार्यान्वयनमा ल्याइएको छ ।

तर, व्यवसायीहरूले भने पर्याप्त पूर्वतयारी र वैकल्पिक पार्किङ व्यवस्थाबिनै नगरपालिकाले निर्णय लागू गर्दा व्यापार व्यवसाय संकटमा परेको बताएका छन् ।  

उनीहरूका अनुसार बजार क्षेत्रमा आउने ग्राहकले सवारी राख्ने स्थान नपाउँदा किनमेल नै घट्न थालेको छ ।

आन्दोलनरत व्यवसायीहरूले “व्यवस्थित पार्किङको विकल्प नदिई गरिएको निषेधात्मक निर्णयले साना व्यवसाय धराशायी हुने खतरा बढेको” बताएका छन् ।  

उनीहरूले तत्काल नगरपालिकासँग संवाद गरी निर्णय पुनरावलोकन गर्न माग गरेका छन् ।

स्थानीय व्यापारीहरूको भनाइमा ट्राफिक व्यवस्थापन आवश्यक भएपनि त्यसको भार व्यवसायीमाथि मात्रै थोपर्न नहुने तर्क छ ।

“शहर व्यवस्थापनको नाममा व्यापार नै बन्द हुने अवस्था आउनु हुँदैन,” एक व्यवसायीले बताएका छन् ।

यता नगरपालिकाले भने दीर्घकालीन रूपमा व्यवस्थित बजार निर्माण गर्न कडा कदम आवश्यक भएको जनाएको छ ।  

नगरपालिकाका अधिकारीहरूले व्यवसायीहरूसँग छलफल गरेर व्यावहारिक समाधान खोजिने बताएका छन् ।