अवैध गतिविधिमा संलग्न विदेशीमाथि अध्यागमनको कडा निगरानी, १८ महिनामा ६७५ नेपालबाट निष्कासित

काठमाण्डौं । अध्यागमन विभागले पछिल्लो डेढ वर्षमा सयौँ विदेशी नागरिकलाई नेपालबाट निष्कासन गरेको तथ्य सार्वजनिक गर्दै विदेशी गतिविधिमाथिको निगरानी थप कडा बनाइएको संकेत दिएको छ ।  

विभागका अनुसार पछिल्लो १८ महिनामा मात्रै ६ सय ७५ विदेशी नागरिक अध्यागमन कानून उल्लङ्घनका कारण देशनिकाला परेका छन् ।

विभागले सार्वजनिक गरेको विवरणअनुसार सन् २०२५ मा ५ सय २३ विदेशी नागरिकलाई निष्कासन गरिएको थियो भने सन् २०२६ को मे २५ सम्म थप १ सय ५२ जनालाई नेपालबाट निकालिएको छ ।  

अवैध बसोबास, भिसा शर्त उल्लङ्घन, गैरकानुनी कामकाज तथा शंकास्पद गतिविधिमा संलग्नता देखिएपछि कारबाही गरिएको जनाइएको छ ।

विदेशी नागरिक व्यवस्थापन सूचना प्रणालीसम्बन्धी कार्यक्रममा विभागका अधिकारीहरूले नेपालमा आउने विदेशी नागरिकको गतिविधिमाथि डिजिटल निगरानी बढाइएको बताएका छन् ।  

देशभरका १८ कार्यालयमार्फत अध्यागमन सुधार, स्थानीय दर्ता प्रणाली र निगरानी संयन्त्रलाई थप व्यवस्थित बनाउने काम भइरहेको विभागको भनाइ छ ।

पछिल्लो समय नेपालमा पर्यटक, व्यवसायी, स्वयंसेवी संस्था र विभिन्न परियोजनाको नाममा आउने विदेशी नागरिकको संख्या बढ्दै जाँदा सुरक्षा निकायले पनि निगरानी विस्तार गरेका छन् । 

अध्यागमन विभागले राष्ट्रिय सुरक्षा, कानूनी व्यवस्था र पर्यटकीय विश्वसनीयता जोगाउन प्रविधिमा आधारित ट्र्याकिङ प्रणालीलाई प्राथमिकतामा राखेको जनाएको छ ।

विभागका अनुसार अब विदेशी नागरिकको आवागमन, बसोबास र गतिविधिसम्बन्धी विवरणलाई डिजिटल प्रणालीमार्फत एकीकृत गर्ने तयारी भइरहेको छ ।  

यसलाई नेपाललाई सुरक्षित र व्यवस्थित पर्यटकीय गन्तव्यका रूपमा स्थापित गर्ने रणनीतिसँग पनि जोडेर हेरिएको छ ।