कक्षा १२ को नतिजा ४५ दिनभित्र प्रकाशित गर्ने तयारी

काठमाण्डौ । राष्ट्रिय परीक्षा बोर्डले यस वर्षको कक्षा १२ को परीक्षाको नतिजा परीक्षा सम्पन्न भएको ४५ दिनभित्र सार्वजनिक गर्ने तयारी गरेको छ। बोर्डका अनुसार नतिजा तयारीसँग सम्बन्धित आधाभन्दा बढी काम हालसम्म सम्पन्न भइसकेको छ।

हाल उत्तरपुस्तिका परीक्षण कार्य देशभरका ४२ केन्द्रमार्फत निरन्तर रूपमा अघि बढिरहेको छ र यसको ठूलो हिस्सा पूरा भइसकेको छ। परीक्षण सकिएका उत्तरपुस्तिकाको सम्परीक्षण तथा प्राप्ताङ्कको डिजिटल प्रविष्टि पनि समानान्तर रूपमा अघि बढाइँदै गरिएको छ।

बोर्डले नतिजा प्रकाशन प्रक्रियालाई छरितो बनाउन परीक्षा सम्पन्न भएलगत्तै उत्तरपुस्तिका परीक्षण सुरु गरेको जनाएको छ। प्रत्येक विषयको परीक्षण सकिएपछि तत्काल सम्परीक्षण र कम्प्युटर प्रणालीमा तथ्याङ्क प्रविष्ट गर्ने व्यवस्था मिलाइएको छ, जसले समग्र प्रक्रिया छिटो बनाउन मद्दत पुगेको बोर्डको दाबी छ।

यस वर्ष कक्षा १२ को परीक्षामा देशभरबाट करिब ४ लाख १८ हजार विद्यार्थी सहभागी भएका थिए।

गत वर्ष माध्यमिक शिक्षा परीक्षा (एसईई) को नतिजा २९ दिनमै प्रकाशित गरेर बोर्डले इतिहासकै सबैभन्दा छिटो परिणाम सार्वजनिक गरेको थियो।