निजी स्कुलमाथि लगाइएको कर दलित विद्यार्थीको पोषण कार्यक्रममा उपयोग गरिनेछः अर्थमन्त्री

काठमाण्डौ । अर्थमन्त्री स्वर्णिम वाग्लेले निजी शैक्षिक संस्थाहरुबाट उठाइएको समता कोषको रकम दलित बालबालिकाको पोषणका लागि उपयोग गरिने बताएका छन् । निजी शैक्षिक संस्थामाथि सरकारले भारी कर बढाएको भन्ने आलोचनाबारे बोल्दै अर्थमन्त्री वाग्लेले यस्तो बताएका हुन्  ।

आगामी आवको बजेटबारे अर्थमन्त्रालयमा आज आयोजित पत्रबार सम्मेलनमा अर्थमन्त्रीले बजेटमा २५ वटा अति गरिब र मानव विकास सूचकांकमा धेरै पछाडि परेका बालबालिकालाई दिदै आएको पोषण भत्तालाई यथावत राखिएको र त्यसको दायित्व ६ अर्ब ५२ करोड रुपैयाँ रहेको बताए । ‘यस वर्ष देशै भरका ३ लाख १३ हजार ७५३ दलित बालबालिकालाई पोषण भत्ता दोब्बर गरेका छौं । यसले हाम्रो दायित्व झण्डै ८ अर्ब नाघेको छ । एउटा सामान्य निजी स्कुलमा २ हजार रुपैयाँ मासिक शुल्क तिरेर पढ्ने बालबालिकाले ३ प्रतिशतका दरले समानता कोषमा तिर्नुपर्ने जम्मा ६० रुपैयाँ तिर्नुपर्छ र त्यो पैसा जाजरकोट र दैलेख जस्ता सरकारी वा सामुदायिक विद्यालयमा अध्यनरत दलित विद्यार्थीको पोषणका लागि उपयोग हुन्छ । महङ्गा स्कुलमा पढ्नेले त्यहि अनुसारको शुल्क तिर्नुपर्छ ।’

यसरी उठाइएको समता कोषको रकम सिधै दलित बालबालिकाको पोषण कार्यक्रममा जाने अर्थमन्त्रीले स्पष्ट पारे । ‘मध्यम वर्गको ढाड सेक्नेगरी वाग्लेले कर लगायो भन्नुभन्दा तपाईको सानो योगदानले निजी र सामुदायिक विद्यालयको दुरी घट्दैछ भन्ने गरी प्रचार गरौँ,’ उनले भने ।