भारतीय शेयर बजारमा भारी गिरावट, सेन्सेक्स ८०० अंकभन्दा बढीले खस्यो

काठमाण्डौं । साताको पहिलो कारोबार दिन भारतीय शेयर बजारमा भारी गिरावट देखिएको छ ।  

बजार खुलेलगत्तै बीएसई सेन्सेक्स ८२१ अंकले घटेर ७३,४२१ को स्तरमा पुगेको छ भने एनएसई निफ्टी–५० पनि २८६ अंकले घट्दै २३,०८० को स्तरमा कारोबार शुरु भएको छ । 

प्रारम्भदेखि नै अधिकांश सूचकांक रातो (नकारात्मक) क्षेत्रमा रहेका छन् ।

मिड र स्मल क्यापमा पनि दबाब

ठूला कम्पनीका सेयर मात्र होइन, मिडक्याप र स्मॉलक्याप सूचकांकमा पनि व्यापक बिक्री चाप देखिएको छ ।

दुवै सूचकांक १.५ प्रतिशतभन्दा बढीले घटेका छन्, जसले बजारमा लगानीकर्ताको मनोबल कमजोर भएको संकेत गर्छ ।

भूराजनीतिक तनावको असर

इजरायलमाथि इरानले गरेको मिसाइल आक्रमणपछि उत्पन्न भूराजनीतिक तनावले विश्व बजारमा असर पारेको छ ।  

बढ्दो अस्थिरताका कारण लगानीकर्ताले जोखिम कम गर्न सेयर बजारबाट पैसा निकाल्न थालेका छन् ।  

यसैबीच अन्तर्राष्ट्रिय बजारमा कच्चा तेलको मूल्य पनि बढ्दै गएको छ, जसले भारतीय अर्थतन्त्रमा थप दबाब सिर्जना गरेको छ ।

एशियाली बजारमा तीव्र गिरावट

एशियाली बजारहरूमा पनि ठूलो गिरावट देखिएको छ ।  

दक्षिण कोरियाको कोस्पी सूचकांक ८ प्रतिशतभन्दा बढीले घट्दा बजारमा अफरातफरी मच्चिएको छ ।  

जापानको निक्केई सूचकांक करिब २,७८० अंकले घटेर ६३,८०४ मा झरेको छ ।  

हङकङको हाङसेङ सूचकांक पनि करिब १.३४ प्रतिशतले घटेर २४,६३० मा कारोबार भइरहेको छ ।

अमेरिकी बजार र फेड नीति प्रभाव

अमेरिकी बजारसँग सम्बन्धित फ्युचर्स पनि दबाबमा देखिएका छन् ।  

डाउ जोन्स फ्युचर्स ०.२५ प्रतिशतले घटेको छ भने एसएन्डपी ५०० र नास्ड्याक फ्युचर्स करिब ०.२ प्रतिशतले कमजोर भएका छन् ।

शुक्रबार अमेरिकी बजार पनि कमजोर बन्द भएको थियो ।  

बलियो रोजगारी तथ्यांकले फेडरल रिजर्भले ब्याजदर कटौती गर्ने अपेक्षा कमजोर बनाएको छ, जसले १० वर्षे अमेरिकी बन्ड यील्ड ४.५ प्रतिशतभन्दा माथि पुर्‍याएको छ ।

कच्चा तेलको मूल्य उकालो

कच्चा तेलको मूल्यमा पनि वृद्धि देखिएको छ ।  

डब्लुटिआई क्रूड २.१६ प्रतिशतले बढेर ९२.५० डलर प्रति ब्यारेल पुगेको छ भने ब्रेन्ट क्रूड २.३५ प्रतिशतले बढेर ९५.२८ डलरमा कारोबार भइरहेको छ ।

अमेरिकी डलर सूचकांक र रुपैयाँ

अमेरिकी डलर सूचकांक ९म्ह्थ्० ०.०३ प्रतिशतले घटेर १००.०४ मा कारोबार भइरहेको छ ।  

नेपाली रुपैयाँ भने ५ जुनमा डलरको तुलनामा ०.८९ प्रतिशतले कमजोर हुँदै ९४.९५ मा बन्द भएको थियो ।