प्रतिनिधिसभामा बजेटमाथि मन्त्रालयगत छलफल असार १ देखि, मन्त्रीहरूले ३–४ गते जवाफ दिने

काठमाण्डौ । प्रतिनिधिसभामा विनियोजन विधेयक, २०८३ अन्तर्गत मन्त्रालयगत बजेट शीर्षकमाथि असार १ र २ गते विस्तृत छलफल हुने भएको छ।  

संघीय संसद् सचिवालयले सार्वजनिक गरेको कार्यतालिकाअनुसार सांसदहरूले उठाएका प्रश्नको जवाफ सम्बन्धित मन्त्रीहरूले असार ३ र ४ गते दिने कार्यक्रम तय गरिएको छ।

कार्यतालिकाअनुसार असार १ गते युवा तथा खेलकुद, उद्योग, कृषि, वन तथा वातावरण, शिक्षा, स्वास्थ्य, भूमि व्यवस्था, संघीय मामिला तथा सामान्य प्रशासन, महिला, बालबालिका तथा सामाजिक सुरक्षा लगायत मन्त्रालयहरूको बजेटमाथि छलफल हुनेछ।

त्यसैगरी असार २ गते गृह, अर्थ, ऊर्जा, परराष्ट्र, रक्षा, पूर्वाधार विकास, कानून, विज्ञान तथा प्रविधि, प्रधानमन्त्री तथा मन्त्रिपरिषद्को कार्यालय, राष्ट्रपतिको कार्यालय र उपराष्ट्रपतिको कार्यालयसहितका निकायहरूको बजेट शीर्षकमाथि छलफल हुने तय गरिएको छ।

सांसदहरूले उठाएका प्रश्नहरूको जवाफ दिने क्रममा असार ३ गते पहिलो दिन छलफल भएका मन्त्रालयका मन्त्रीहरूले जवाफ दिनेछन् भने असार ४ गते दोस्रो दिनका मन्त्रालयका मन्त्रीहरूले सम्बोधन गर्नेछन्।

यसअघि सरकारले जेठ १५ गते आगामी आर्थिक वर्ष २०८३/८४ का लागि राजस्व र व्ययको वार्षिक अनुमान (बजेट) प्रस्तुत गरेको थियो। प्रतिनिधि सभामा बजेटमाथिको सामान्य छलफल भने यसअघि नै सम्पन्न भइसकेको छ।