चितवन राष्ट्रिय निकुञ्जभित्रको जङ्गल सफारी सेवा आजदेखि बन्द

काठमाण्डौ । चितवन राष्ट्रिय निकुञ्ज भित्र सञ्चालन हुँदै आएको जङ्गल सफारी सेवा आजदेखि अर्को सूचना जारी नभएसम्मका लागि बन्द गरिएको छ। वर्षायामका कारण सम्भावित प्राकृतिक जोखिम तथा वन्यजन्तुको संरक्षणलाई मध्यनजर गर्दै निकुञ्ज प्रशासनले उक्त निर्णय गरेको हो।

वर्षायाममा भलबाढी आउने, रुख ढलेर वनपथ अवरुद्ध हुने, कच्ची सडक बिग्रिने तथा जङ्गलभित्रका साना खोला–खोल्सीमा पानीको बहाव बढ्ने भएकाले पर्यटकको सुरक्षालाई ध्यानमा राखी सफारी सेवा स्थगित गरिएको जनाइएको छ।

वर्षायाम वन्यजन्तु तथा चराचुरुङ्गीको प्रजननका लागि पनि उपयुक्त समय भएकाले तिनको प्राकृतिक बासस्थानमा अनावश्यक अवरोध नहोस् भन्ने उद्देश्यले समेत सफारी बन्द गरिएको हो ।

निकुञ्जले हरेक वर्ष वर्षायाममा जङ्गल सफारी सेवा बन्द गर्ने परम्परा रहेको छ। मौसममा सुधार आएपछि, सामान्यतया दसैँ आसपास, अवस्था मूल्याङ्कन गरी सेवा पुनः सञ्चालन गरिने निकुञ्जले जनाएको छ।

यद्यपि, निकुञ्जभित्रको जङ्गल सफारी बन्द भए पनि सामुदायिक वन क्षेत्रमा सञ्चालन हुने जीप सफारी भने नियमित रूपमा जारी रहनेछ। सौराहा, कसरा, मेघौली, माडी तथा नवलपरासी क्षेत्रबाट सञ्चालन हुने जीप सफारीमार्फत पर्यटकले सामुदायिक वन क्षेत्रमा भ्रमण गर्न सक्नेछन्।