नक्कली भुटानी शरणार्थी प्रकरणमा सुनुवाइ सकियो, आजै फैसला सुनाउने तयारी

काठमाण्डौ  । बहुचर्चित नक्कली भुटानी शरणार्थी प्रकरणमा काठमाडौं जिल्ला अदालतमा जारी सुनुवाइ सकिएको छ। न्यायाधीश तेजबहादुर खड्काको इजलासमा जेठ २७ गतेदेखि निरन्तर सुनुवाइमा राखिएको मुद्दाको बहस सकिएसँगै अदालतले आजै फैसला सुनाउने तयारी गरेको छ।

नेपाली नागरिकलाई नक्कली भुटानी शरणार्थी बनाएर अमेरिका लगायत विभिन्न देशमा पठाउने भन्दै ठूलो रकम असुली गरिएको आरोपसहित दायर यो मुद्दा लामो समयदेखि अदालतमा विचाराधीन थियो। अदालतले प्राथमिकतामा राखेर निरन्तर सुनुवाइ अघि बढाएपछि मुद्दा फैसला चरणमा पुगेको हो।

यो प्रकरणमा पूर्वउपप्रधानमन्त्री तथा एमाले नेता टोपबहादुर रायमाझी, पूर्वगृहमन्त्री तथा कांग्रेस नेता बालकृष्ण खाण, तत्कालीन गृहसचिव टेकनारायण पाण्डे, पूर्वसांसद आङटावा शेर्पा र तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईसहित ३० जनाविरुद्ध मुद्दा दायर गरिएको थियो।

प्रतिवादीहरूविरुद्ध लिखत किर्ते, ठगी, संगठित अपराध र राज्यविरुद्धको अपराधसम्बन्धी कसुरमा अभियोग लगाइएको छ। अभियोगपत्रमा संगठित गिरोहको योजनामा नेपाली नागरिकलाई भुटानी शरणार्थीका रूपमा प्रस्तुत गरी विदेश पठाउने आश्वासनमा रकम असुली गरिएको दाबी गरिएको छ।

प्रकरणमा मुख्य बिचौलिया भनिएका केशव दुलाल, उनकी पत्नी दीपा हुमागाईं, सानु भण्डारी, सन्देश शर्मा, टंककुमार गुरुङ, मोहनराज राई, निरञ्जनकुमार खरेल, केशव तुलाधर, हरिभक्त महर्जन, लक्ष्मी महर्जन, राजेश अर्याल, विनिता साउदेन लिम्बु, सागर राई, आशिष बुढाथोकी, सुनिल बुढाथोकी, रामशरण केसी, अशोक पोखरेल, गोविन्दकुमार चौधरी, धीरेन राई, बेचन झा र भुटानी शरणार्थी नेता टेकनाथ रिजालविरुद्ध पनि सोही कसुरमा मुद्दा चलाइएको छ।

राजनीतिक नेतृत्व, उच्च प्रशासक र बिचौलियासम्म जोडिएको यो मुद्दालाई भ्रष्टाचार र संगठित ठगीसँग जोडिएको सबैभन्दा चर्चित प्रकरणका रूपमा हेरिँदै आएको छ। अब अदालतको फैसलाले आरोपितहरूको कसुर ठहर हुने वा सफाइ पाउने भन्ने टुंगो लगाउनेछ।