प्रधानमन्त्री र मन्त्रीहरू जनता र पार्टी नेतृत्वप्रति जवाफदेही हुनुपर्छ : अर्थमन्त्री वाग्ले

 काठमाण्डौ ।  अर्थमन्त्री डा. स्वर्णिम वाग्लेले प्रधानमन्त्रीदेखि विभागीय मन्त्रीसम्म नेपाली जनता, सम्बन्धित राजनीतिक दल र पार्टी नेतृत्वप्रति जवाफदेही हुनुपर्ने बताएका छन्।

आर्थिक वर्ष २०८३/८४ को बजेट कार्यान्वयन योजनाबारे मंगलबार सबै मन्त्रालयका सचिवहरूसँग भएको छलफलमा अर्थमन्त्री वाग्लेले राज्य सञ्चालनमा जवाफदेहिता, पारदर्शिता र सुशासन अनिवार्य रहेको बताएका हुन्।

उनले प्रधानमन्त्री र मन्त्रीहरू जनताबाट मात्र नभई आफू आबद्ध राजनीतिक दल र नेतृत्वबाट समेत जवाफदेही बनाइने स्पष्ट पारे।

“प्रधानमन्त्रीदेखि विभागीय मन्त्रीसम्म हामी सबै नेपाली जनता, आफ्नो पार्टी र सम्बन्धित नेतृत्वप्रति उत्तरदायी छौँ,” वाग्लेले भने।

सरकार सुशासन, इमानदारी र भ्रष्टाचार नियन्त्रणका विषयमा कडा रूपमा प्रस्तुत हुने उनको भनाइ थियो। भ्रष्टाचारप्रति शून्य सहनशीलताको नीति अवलम्बन गर्दै पुराना विकृति र विसंगति हटाउँदै जाने उनले बताए।

अर्थमन्त्री वाग्लेले कर्मचारीतन्त्रलाई परिणाममुखी बनाउन आवश्यक प्रोत्साहनको व्यवस्थासमेत गरिने उल्लेख गरे। कर्मचारीको क्षमता र कार्यसम्पादनका आधारमा प्रोत्साहन गर्दै बजेट कार्यान्वयनलाई प्रभावकारी बनाइने उनको भनाइ थियो।

सरकारले पारदर्शिता, जवाफदेहिता र अनुशासनलाई प्राथमिकतामा राखेर अघि बढ्ने भन्दै उनले बजेट कार्यान्वयनमा सबै मन्त्रालय र कर्मचारी संयन्त्र जिम्मेवार हुनुपर्नेमा जोड दिए।