नयाँ सवारीसाधन खरिदका लागि कुन बैंकले कति दिन्छन् अटो लोन ?

–रविन ठकुरी

 

 

काठमाण्डौ । बैंक तथा वित्तीय संस्थाले नयाँ सवारीसाधन खरिद गर्नका लागि अटो लोन र हायर पर्चेज कर्जा प्रवाह गर्दै आएका छन् । उनीहरुले यस्ता प्रकृतिको कर्जा प्रवाहका लागि विभिन्न स्किम (अफर) ल्याएका हुन् ।

उनीहरुले नयाँ इभी र इन्धन गाडी खरिदका लागि ६० प्रतिशतसम्मको फाइनान्सिङ्ग सुविधा उपलब्ध गराइरहेका छन् । एनआइसी एशिया बैंकले ७.९९ प्रतिशत व्याजदरमा अधिकतम १० वर्षका लागि २ करोड रुपैयाँसम्मको अटो लोन उपलब्ध गराइरहेको छ ।

नविल बैंक, नेपाल बैंक, सिद्धार्थ, हिमालयन, नेपाल एसबिआई, सनराइज, सानिमा र कुमारी बैंकले ५० देखि ८० प्रतिशतसम्मको बैंक फाइनान्सिङ्ग उपलब्ध गराएको हो । उनीहरुले ५ देखि १० वर्षसम्मको कर्जा भुक्तानी अवधि दिएका छन् ।

सहुलियत व्याजदरमा नयाँ निजी तथा कमर्सियल सवारीसाधन खरिदका लागि अटो लोन सुविधा उपलब्ध गराइरहेका हुन् ।

एनआइसी एशिया बैंकको अटो लोनः ७.९९ प्रतिशत ब्याजदरमा १० वर्षसम्म कर्जा

एनआइसी एशिया बैंकले नयाँ सवारीसाधन खरिद गर्न चाहनेलाई ८० प्रतिशतसम्मको कर्जा प्रवाह गरिरहेको छ । यसका लागि बैंकले ७.९९ प्रतिशतको फिक्सड व्याजदरमा अधिकतम १० वर्ष अवधिका लागि कर्जा प्रवाह गरिरहेको छ ।

अटो लोन अन्तर्गत टर्म लोनका लागि कर्जा लिने व्यक्तिको उमेर न्युनतम २१ वर्षको हुनुपर्दछ । उसको उमेर कर्जा म्याचुरिटी हुने समयसम्म अधिकतम ७० वर्षभन्दा माथि हुनु हुँदैन । यस्तो प्रकृतिको कर्जा ५ लाखदेखि २ करोड रुपैयाँसम्म लिन पाइन्छ । कर्जा भुक्तानीको अवधि १० वर्षको हुन्छ ।

पेट्रोल र डिजेल गाडीको लागि ६० प्रतिशतसम्म फाइनान्सिङ्गको व्यवस्था छ । विद्युतीय सवारीसाधन (इभी) को लागि पनि ६० प्रतिशतसम्मको फाइनान्सिङ्गको व्यवस्था गरेको छ । यो कर्जा निजी प्रयोजनको सवारीसाधनको हकमा लागू हुन्छ ।

हरियो प्लेट (पर्यटक बोक्ने सवारीसाधन) का लागि अटो लोन अन्तर्गतको टर्म लोनमा अधिकतम ४ लाखदेखि २ करोड रुपैयाँसम्मको कर्जा पाइन्छ । कर्जा भुक्तानी अवधि अधिकतम ७ वर्षको रहनेछ । बैंकबाट हरियो प्लेटको इभीका लागि ६० प्रतिशतसम्मको बैंक फाइनान्सिङ्ग पाइन्छ ।

इभीबाहेक अरुको हकमा ८० प्रतिशतसम्मको बैंक फाइनान्सिङ्गको सुविधा पाइन्छ । कमर्सियल (सार्वजनिक) यातायातको हकमा न्युनतम ४ लाखदेखि ३ करोड रुपैयाँसम्मको कर्जा पाइन्छ । कर्जा लिने व्यक्तिको उमेर कर्जा म्याचुरिटी हुने समयसम्म न्युनतम २१ वर्षदेखि अधिकतम ६५ वर्षसम्मको हुनु पर्दछ ।

ट्याक्सीका लागि अधिकतम ७ वर्ष र न्युनतम ५ वर्षका लागि बैंक फाइनान्सिङ्गको सुविधा दिएको छ । इभीको लागि ६० प्रतिशतसम्म र इभीबाहेक अन्यका लागि ५० प्रतिशतसम्मको बैंक फाइनान्सिङ्गको सुविधा दिएको छ ।

इभीदेखि निजी गाडीसम्मः नविल बैंकले ल्यायो ८० लाखसम्मको सवारी कर्जा

नविल बैंकले निजी प्रयोजनको नयाँ गाडी खरिदका लागि ८० लाख रुपैयाँसम्मको कर्जा प्रवाह गरिरहेको छ । यसको भुक्तानी अवधि अधिकतम ७ वर्षको हुन्छ । यसका लागि ६० प्रतिशतसम्मको बैंक फाइनान्सिङ्ग उपलब्ध छ ।

इन्धन प्रयोग गर्ने नयाँ कमर्सियल (सार्वजनिक) सवारीसाधनका लागि अधिकतम ७० प्रतिशतसम्म र न्युनतम ५० प्रतिशतसम्मको बैंक फाइनान्सिङ्ग उपलब्ध छ । प्रयोग भएका पुराना निजी र कमर्सियलका लागि अधिकतम ८० लाख रुपैयाँसम्मको कर्जा प्रवाह गरिन्छ । कर्जा भुक्तानी अवधि ६ वर्षको रहनेछ ।

तर सवारीसाधनको उमेर लोन म्याचुरिटी हुने समयसम्म ७ वर्ष माथि जानु हुँदैन । सवारीसाधनको मूल्यको ५० प्रतिशतसम्म बैंक फाइनान्सिङ्ग सुविधा उपलब्ध रहेको छ । इभीका लागि ८० लाख रुपैयाँसम्मको कर्जा पाइन्छ । कर्जा भुक्तानी अवधि ७ वर्षको रहने छ ।

यसमा ६० प्रतिशतसम्मको बैंक फाइनान्सिङ्ग सुविधा उपलब्ध छ । कमर्सियल (सार्वजनिक) इभीका लागि ६० प्रतिशतसम्मको फाइनान्सिङ्ग सुविधा उपलब्ध छ । कर्जा भुक्तानी अवधि ६ वर्षको रहनेछ ।

ग्लोबल बैंकले इभी र इन्धन गाडीमा ६०५ सम्म फाइनान्सिङ्ग, ब्याजदर ५.९९ प्रतिशतदेखि

ग्लोबल आइएमई बैंकले निजी इन्धन र इभी गाडीका लागि ६० प्रतिशतसम्मको बैंक फाइनान्सिङ्ग उपलब्ध गराएको छ । कर्जा भुक्तानी अवधि अधिकतम ७ वर्षको रहेको छ । इभी हाइब्रिडको लागि अटो लोन स्किम अन्तर्गत कर्जा भुक्तानी अवधि अधिकतम ३ वर्षको रहेको छ ।

यसमा इलाइटका लागि ५.९९ देखि ७.९९ प्रतिशत व्याजदरमा कर्जा उपलब्ध छ । अल्टिमेटका लागि ६.२४ देखि ७.९९ प्रतिशत व्याजदरमा कर्जा उपलब्ध छ । प्राइमका लागि ६.४९ देखि ७.९९ प्रतिशतको व्याजदरमा कर्जा उपलब्ध छ ।

अधिकतम ५ वर्ष भुक्तानी अवधिको इभीको लागि इलाइट अन्तर्गत ६.९९ देखि ८.९९ प्रतिशतको व्याजदर उपलब्ध छ । अल्टिमेट अन्तर्गत ७.२४ देखि ८.९९ प्रतिशत व्याजदरमा कर्जा उपलब्ध छ । प्राइम अन्तर्गत ७.४९ देखि ८.९९ प्रतिशत व्याजदरमा कर्जा उपलब्ध छ ।

अधिकतम ७ वर्ष कर्जा भुक्तानीको इलाइट अन्तर्गत ७.२४ देखि ८.९९ प्रतिशत व्याजदरमा कर्जा उपलब्ध छ । अल्टिमेट अन्तर्गत ७.४९ देखि ८.९९ प्रतिशत व्याजदरमा कर्जा उपलब्ध रहेको छ । यसैको प्राइम अन्तर्गत ७.७४ देखि ८.९९ प्रतिशत व्याजदरमा कर्जा उपलब्ध रहेको छ ।

इन्धन गाडी अन्तर्गत ५ वर्षको कर्जा भुक्तानी अवधिका लागि इलाइटमा ७.४९ देखि ९.४९ प्रतिशत व्याजदरमा कर्जा उपलब्ध छ । अल्टिमेट अन्तर्गत ७.७४ देखि ९.४९ प्रतिशत व्याजदरमा कर्जा उपलब्ध रहेको छ । यसैको प्राइम अन्तर्गत ७.९९ देखि ९.४९ प्रतिशत व्याजदरमा कर्जा उपलब्ध रहेको छ ।

यसैको ७ वर्ष कर्जा भुक्तानी अन्तर्गतको इलाइटमा ७.७४ देखि ९.४९ प्रतिशत व्याजदरमा कर्जा पाइन्छ । अल्टिमेट अन्तर्गत ७.९९ देखि ९.४० प्रतिशत व्याजदरमा कर्जा उपलब्ध रहेको छ । यसैको प्राइम अन्तर्गत ८.२४ देखि ९.४९ प्रतिशत व्याजदरमा कर्जा उपलब्ध रहेको छ ।                      

एनआईएमबी बैंकः २.५ करोडसम्मको अटो लोन, १० वर्षसम्म भुक्तानी अवधि

नेपाल इन्भेष्टमेन्ट मेगा बैंकले नयाँ सवारीसाधन खरिदका लागि सहुलियत ब्याजमा अटो लोन र हायर पर्चेज कर्जा प्रवाह गरिरहेको छ । बैंकले १० लाखदेखि ५० लाख रुपैयाँसम्मको गाडी खरिदका लागि ५ वर्ष अवधिको अटो लोन र हायर पर्चेज कर्जा प्रवाह गरिरहेको छ ।

५० लाखदेखि १ करोड रुपैयाँसम्म मूल्य पर्ने गाडी खरिद गर्नका लागि ७ वर्ष अवधिको कर्जा प्रवाह गरिरहेको छ । १ करोड रुपैयाँभन्दा माथिको गाडी खरिद गर्नका लागि १० वर्ष अवधिको लागि कर्जा प्रवाह गरिरहेको छ । अर्थात नयाँ सवारीसाधन खरिदका लागि न्युनतम ५ वर्ष र अधिकतम १० वर्षका लागि कर्जा प्रवाह गरिन्छ ।

प्रयोग भइसकेका सेकेन्ड ह्याण्ड गाडी खरिदका लागि अधिकतम ५ वर्षका लागि कर्जा प्रवाह गरिन्छ । तर कर्जा म्याचुरिटी हुने समयसम्म सवारीसाधनको आयु १० वर्षभन्दा माथि हुनु हुँदैन ।

बैंकबाट न्युनतम १० लाख र अधिकतम २ करोड ५० लाख रुपैयाँसम्मको अटो लोन पाइन्छ । साथै, न्युनतम १ करोड र अधिकतम २ करोड रुपैयाँसम्मको हायर पर्चेज कर्जा पाइन्छ ।

नयाँ गाडी खरिदमा नेपाल बैंकदेखि सिद्धार्थ बैंकसम्मको अटो लोन सुविधा

नेपाल बैंक लिमिटेडले नयाँ सवारीसाधन खरिदका लागि अटो लोनको सुविधा दिँदै आएको छ । उनीहरुले नयाँ निजी सवारीसाधन खरिदका लागि ६० प्रतिशत फाइनान्सिङ्गको सुविधा दिएको छ । कर्जा भुक्तानी अवधि २ देखि ७ वर्षको रहेको छ ।

त्यसैगरि, कृषि विकास बैंक लिमिटेडले अटो लोनमा ६० प्रतिशतसम्मको फाइनान्सिङ्ग सुविधा दिएको छ । कर्जा भुक्तानी अवधि अधिकतम ७ वर्षको रहेको छ ।

एभरेष्ट बैंक लिमिटेडले निजी प्रयोजनको इन्धन र इभी गाडीको खरिदका लागि ६० प्रतिशतसम्मको बैंक फाइनान्सिङ्ग उपलब्ध गराइरहेको छ । कर्जा भुक्तानी अवधि अधिकतम ७ वर्षको रहेको छ ।

सिद्धार्थ बैंकले नयाँ सवारीसाधन खरिदका लागि ६० प्रतिशतसम्मको फाइनान्सिङ्ग सुविधा उपलब्ध गराइरहेको छ । कर्जा भुक्तानी अवधि ७ वर्षको रहेको छ ।

अटो लोनमा प्रतिस्पर्धाः हिमालयन, नेपाल एसबिआई र लक्ष्मी सनराइजका योजना

हिमालयन बैंकले निजी प्रयोजनका लागि अटो लोनमा ६.७५ प्रतिशत व्याजदरमा हायर पर्चेज कर्जा प्रवाह गरिरहेको छ । कर्जा भुक्तानी अवधि ७ वर्षको रहेको छ ।

नेपाल एसबिआई बैंकको हायर पर्चेज कर्जा स्किम अन्तर्गत गाडीको मूल्यको ७० प्रतिशतसम्म बैंक फाइनान्सिङ्ग उपलब्ध गराइरहेको छ । कर्जा भुक्तानी अवधि ७ वर्षको रहेको छ । यो स्किम निजी, कमर्सियल, विजनेस प्रयोजनका सवारीसाधनको लागि हो ।

लक्ष्मी सनराइज बैंकले नयाँ सवारीसाधन खरिदका लागि ६० प्रतिशतसम्म बैंक फाइनान्सिङ्ग उपलब्ध गराइरहेको छ । बैंकले १ करोड रुपैयाँसम्मको कर्जा उपलब्ध गराइरहेको छ । कर्जा भुक्तानी अवधि ७ वर्षको रहने छ ।

लक्ष्मी सनराइज बैंकले प्रयोग भएका पुरानो गाडीका लागि ५० प्रतिशतसम्मको बैंक फाइनान्सिङ्ग उपलब्ध गराइरहेको छ । बैंकले ४० लाख रुपैयाँसम्मको अधिकतम कर्जा उपलब्ध गराइरहेको छ । कर्जा भुक्तानी अवधि ५ वर्षको रहेको छ ।

इभी खरिदमा बैंकहरूको प्रतिस्पर्धाः सानिमाको ७५ लाख लोन, कुमारीको ६० % फाइनान्सिङ्ग

सानिमा बैंकले नयाँ इभी खरिदका लागि अधिकतम ७५ लाख रुपैयाँसम्मको अटो लोन प्रवाह गरिरहेको छ । नयाँ सवारीसाधनका लागि कर्जा भुक्तानी अवधि अधिकतम १० वर्षको रहेको छ ।

प्रयोग भएका पुरानो इन्धन सवारीसाधनका लागि अधिकतम कर्जा भुक्तानी अवधि ५ वर्षको रहेको छ भने इभीको लागि ७ वर्षको रहेको छ ।

कुमारी बैंकले इभी र इन्धन गाडी खरिदका लागि ६० प्रतिशतसम्मको बैंक फाइनान्सिङ्ग उपलब्ध गराइरहेको छ ।