अप्रिलमा १.११ लाख पर्यटक नेपाल भित्रिए, चार महिनामा कुल ४.१६ लाखको आगमन

TOURISM
बिहीबार, बैशाख २०,२०८१ 16:12:51

काठमाण्डौ । नेपालमा अप्रिल महिनामा १ लाख बढी पर्यटक भित्रिएका छन् । नेपाल पर्यटन बोर्डको तथ्यांक अनुसार अप्रिल महिना १ लाख ११ हजार ३७३ जना पर्यटक नेपाल भित्रिएका हुन् । यो संख्या गत वर्षको अप्रिल महिनाको तुलनामा धेरै हो ।

गत वर्षको अप्रिल महिनामा ९८ हजार ७७३ जना पर्यटक नेपाल आएका थिए । गत मार्च महिनामा भने १ लाख २८ हजार १६७ पर्यटक नेपाल आएका थिए ।

यस्तै फेब्रुअरी महिना ९७ हजार ४२६ र जनवरी महिनामा ७९ हजार १ सय जना पर्यटक नेपाल भित्रिएका थिए । यसरी यो वर्ष ४ महिनामा ४ लाख १६ हजार ६६ पर्यटक नेपाल भित्रिएका छन् ।

अप्रिल महिनामा भारतबाट सबैभन्दा धेरै पर्यटक नेपाल आएका छन् । भारतबाट एक महिनाको अवधिमा ३० हजार १५८ पर्यटक नेपाल आएका छन् । दोस्रो स्थानमा चीनबाट ९ हजार ७४० पर्यटक नेपाल आएका छन् ।

त्यस्तै अमेरिकाबाट ९ हजार ३९९ र बेलायतबाट ५ हजार ३९१ पर्यटक नेपाल आएका छन् ।

चार महिनाको अवधिमा भारतबाट कुल १ लाख १० हजार ५७३,चीनबाट ३८ हजार २९० र अमेरिकाबाट ३६ हजार ४८६ पर्यटकले नेपाल भ्रमण गरेका छन् । यसरी चार महिनाको अवधिमा नेपालमा औषत १ लाख ४ हजार १६ पर्यटक नेपाल आएका छन् ।