.gif)
(1).gif)
.jpg)
_(1).gif)
.png)
काठमाण्डौ । पछिल्लो समय नेपाली बजारमा विद्युतीय चार पाङ्ग्रे सवारी साधन भित्र्याउने होडबाजी चलेको छ । अटोको व्यापारमा स्थापित घरानादेखि नयाँ व्यवसायीहरुले समेत इभी गाडीकै आयातमा ध्यान केन्द्रीत गरेका छन् । जसका कारण विभिन्न मुलुकमा बनेका इभी गाडीहरु एकपछि अर्को नेपाल भित्रिने क्रम तीव्र बनेको छ ।
यो क्रममा चीनमा बनेका इभी गाडीहरुको बोलवाला चलिरहेको छ । आधुनिक र नयाँ फिचर्सले सुसज्जित इभी गाडी भित्र्याउने होडबाजी निकै रोचक पनि देखिन्छ ।
यहीबेला इभी गाडीका आयातकर्ताहरुमध्ये कतिपयले एकथोकको प्रचार गरी कम गुणस्तरका गाडी समेत धमाधम भित्र्याइरहेका छन् । प्रचार एकथोक गरी ग्राहकलाई लोभ्याउने, तर गुणस्तरहीन प्रडक्ट थमाएर ठगीधन्दा चलाउने क्रम पनि उत्तिकै बढेको छ ।
यो क्रममा कसैले आफूले भित्र्याएको इभी गाडीले दिने माइलेजको नाममा ठगी गरिरहेका छन् भने कतिपयले त सामान्य गाडीलाई समेत प्रिमियम भन्दै बिक्री गरिरहेका छन् ।
विभिन्न झूठा प्रचारको पछि लागेर इभी गाडी किन्न तँछाडमछाड गर्ने कतिपय ग्राहकहरुको यसप्रतिको धारणा नै नकारात्मक बन्ने डर पनि उत्तिकै बढेको छ । इभी गाडीको व्यापार भर्खरै चम्किरहेको नेपालजस्तो मुलुकमा बिजुलीमा चार्ज गरेर निकै कम लागतको इन्धनमा कुदाउन सकिने गाडीहरुको परफरमेन्स प्रचार गरिएजस्तो सन्तोषजनक भने छैन । यसको थप पुष्टि गर्न शुक्रबारको एउटा घटना काफी छ ।
शुक्रबार एक मिडिया कम्पनीले ललितपुरको कुपण्डोलदेखि सौराहासम्मको मोटर र्याली आयोजना गरेको थियो । जसमा नेपालमा चार पाङ्ग्रे विद्युतीय साधनमा बजार तताइरहेकादेखि भर्खरै भित्रिएका इभी ब्राण्डका गाडीहरु समेत सहभागी थिए ।
कुपण्डोलबाट सुरु भएको सो र्याली दक्षिणकाली, भीमफेदी हुँदै हेटौडा निस्किएर सौराहासम्म पुग्ने कार्यक्रम रहेको थियो । सोही रुट हुँदै सौराहाका लागि हिँडेका नेपालको इभी मार्केटमा निकै राम्रो व्यापार गरिरहेका टप भनिएका ब्राण्डहरुले नै चालकलाई धोका दिए ।
र्यालीका एक सहभागीका अनुसार एमजीको जेड एक्स र डिपलका इभी गाडी भीमफेदीको उकालो उक्लिनै सकेनन् । कयौं कोशिश गर्दा पनि एमजीको जेड एक्स र डिपलका गाडी उक्लिन नसकेपछि काठमाण्डौ फर्काइएको थियो ।
‘भीमफेदीको उकालो हुँदै देउराली पार गर्ने क्रममा बीवाइडीको अट्टो थ्रीको समेत बिजोग अवस्था देखियो ।’ ती सहभागी भने–‘अट्टो थ्री पनि चिप्लिदै जोखिमपूर्ण ढंगले बल्लतल्ल माथिसम्म पुग्यो । एमजी र डिपल त दर्जनौ कोशिशका बाबजुद माथि पुग्नै सकेनन् । अन्य कम्पनीका केही इभी गाडीलाई भने ठेलेर पनि माथि पुर्याइएको बिजोगलाग्दो दृश्य देखियो ।’
पावर र पिकअप प्रचार गरिएजस्तो राम्रो नहुँदा इभी गाडीहरुमा यस्तो समस्या देखिएको अनुभवी ग्राहकहरुको भनाई छ । 'भीमफेदीको उकालो नै चढ्न नसक्ने गाडीलाई ल्याएर महङ्गो मूल्यमा भिराइएको छ । ग्राहक पनि यसमा चूपचाप ठगिन तयार छन् ।' मोटर -र्यालीमा सहभागी अर्का इभीप्रेमीले भने-'यसबाट त्यस्ता उकालो हुँदै भोलिका दिनमा सर्वसाधारणले पावर र परफरमेन्स कम भएका इभीबाट यात्रा गर्न असम्भव छ भन्ने पनि देखाउँछ ।'
नेपालमा पछिल्लो समय साह्रै धेरै बिक्री भएको इभीमा पर्छ बीवाइडी ब्राण्ड । यसको अट्टो थ्री धेरैको रोजाई पनि बनेको छ । तर, अट्टो थ्री यसअघि पनि पोखराबाट साराङकोट जाने उकालोमा उक्लिन नसकेको घटना गुपचुप पारिएको थियो । त्यसबेला नाडा अटोमोवाइल एशोसिएसनकै एक पदाधिकारीकी पत्नीले त्यस्तो दुःख पाएकी थिइन् ।
शुक्रबार भीमफेदीको उकालोमा उक्लिन नसकेर काठमाण्डौ फिर्ता भएको एमजीको जेड एक्सको मूल्य ५३ लाखदेखि ७२ लाखसम्म तोकिएको छ । उता, कमजोर फिचर्ससहित नेपाल भित्र्याएर प्रिमियम सेग्मेन्ट भन्दै झूठो प्रचारका भरमा बिक्री सुरु गरिएको डिपलको मूल्य ७२ लाख रुपैयाँ छ ।
.gif)
.png)
.gif)
.gif)
