हिमालयन रि–इन्स्योरेन्स रु.२.३३ अर्ब घाटामा,आम्दानी घट्दा खर्चमा ठूलो वृद्धि

काठमाण्डौ । हिमालयन रि–इन्स्योरेन्स लिमिटेडले आर्थिक वर्ष २०८२/८३ को चौथो त्रैमासिक अपरिष्कृत वित्तीय विवरण सार्वजनिक गरेको छ । सार्वजनिक विवरणअनुसार कम्पनीले गत आवमा २ अर्ब ३३ करोड ६२ लाख रुपैयाँ खुद नोक्सानी व्यहोरेको छ ।

अघिल्लो आर्थिक वर्ष २०८१/८२ को असार मसान्तसम्म कम्पनीले १ अर्ब ३९ करोड ३ लाख रुपैयाँ खुद नाफा कमाएको थियो । तर, गत आर्थिक वर्षमा आम्दानीमा आएको कमी र खर्चमा भएको उल्लेख्य वृद्धिले कम्पनीको वित्तीय अवस्था कमजोर बनेको देखिएको छ ।

गत आवमा कम्पनीको कुल आम्दानी ९.३७ प्रतिशतले घटेर ७ अर्ब ५७ लाख रुपैयाँ मा सीमित भएको छ । यसको विपरीत कुल खर्च भने ८०.९६ प्रतिशतले बढेर १० अर्ब ४४ करोड ८६ लाख रुपैयाँ पुगेको छ ।

त्यस्तै, कम्पनीको खुद बीमाशुल्क आर्जन पनि अघिल्लो आर्थिक वर्षको तुलनामा ५.६९ प्रतिशतले घटेर ६ अर्ब १ करोड ५६ लाख रुपैयाँ मा झरेको छ ।

कम्पनीमाथि दाबी भुक्तानीको बढ्दो भारसमेत परेको छ । समीक्षा अवधिमा कुल दाबी भुक्तानी ३३.६४ प्रतिशतले बढेर ३ अर्ब ४४ करोड ९० लाख रुपैयाँ पुगेको छ  । यसैगरी, लगानीबाट प्राप्त आम्दानीमा समेत २७.३० प्रतिशतको गिरावट आएको छ ।

आम्दानी र नाफामा आएको गिरावटको प्रभाव कम्पनीको सञ्चित नाफामा पनि परेको छ । कम्पनीको रिटेन्ड अर्निङ ३ अर्ब २८ करोड ६ लाख रुपैयाँले ऋणात्मक भएको छ ।

वित्तीय प्रदर्शन कमजोर भएसँगै कम्पनीको प्रतिसेयर आम्दानी (ईपीएस) पनि नकारात्मक भएको छ । अघिल्लो आर्थिक वर्षमा १२.७९ रुपैयाँ रहेको ईपीएस गत आर्थिक वर्षको अन्त्यसम्ममा २१ रुपैयाँ ५० पैसा ऋणात्मक भएको छ ।

त्यस्तै, कम्पनीको प्रतिसेयर नेटवर्थ ११५ रुपैयाँ ५८ पैसा कायम भएको छ । यसैगरी, कम्पनीको महाविपत्ति कोषको आकार पनि अघिल्लो वर्षको तुलनामा २७.०८ प्रतिशतले घटेर १४ करोड ४४ लाख रुपैयाँ मात्रै संचित रहेको छ ।  

समग्रमा, आम्दानीमा आएको संकुचन, दाबी भुक्तानी तथा अन्य खर्चमा भएको वृद्धि र लगानी आम्दानीमा आएको गिरावटका कारण हिमालयन रि–इन्स्योरेन्सको गत आर्थिक वर्षको वित्तीय प्रदर्शनमा उल्लेख्य दबाब परेको देखिन्छ ।