किभमा रुसी मिसाइल र ड्रोन आक्रमण तीव्र, बालकसहित तीन जनाको मृत्यु

काठमाण्डौ । रुसले युक्रेनको राजधानी किभ र आसपासका क्षेत्रमा गरेको हवाई आक्रमणमा बालकसहित कम्तीमा तीन जनाको मृत्यु भएको छ। युक्रेनी अधिकारीहरूका अनुसार आक्रमणमा थप सात जना घाइते भएका छन्।

बुधबार बिहान भएको आक्रमणमा रुसी सेनाले मिसाइल तथा ड्रोन प्रयोग गरेको युक्रेनी अधिकारीहरूले बताएका छन्। किभ सहरमा दुई जनाको मृत्यु र चार जना घाइते भएको तथा विभिन्न स्थानमा घर, पसल र गोदाममा आगलागी तथा क्षति पुगेको जनाइएको छ। किभ आसपासको क्षेत्रमा भएको छुट्टै मिसाइल तथा ड्रोन आक्रमणमा एक बालकको मृत्यु भएको र तीन जना घाइते भएका छन्।

पछिल्ला दिनमा रुसले किभमाथि तीव्र गतिमा उड्ने ड्रोन र ब्यालिस्टिक मिसाइल प्रयोग गर्दै आएको छ। युक्रेनको वायु प्रतिरक्षा प्रणालीलाई यस्ता आक्रमण रोक्न चुनौती बढेको छ। अमेरिकी प्याट्रियट मिसाइलको सीमित उपलब्धता पनि युक्रेनका लागि प्रमुख चुनौतीका रूपमा देखिएको छ।

आक्रमणको जोखिमका कारण छिमेकी नेटो सदस्य राष्ट्रहरू पोल्यान्ड र रोमानियाले पनि आफ्नो हवाई क्षेत्रमा लडाकु विमान परिचालन गरेका छन्।

यसैबीच, युक्रेनी सेनाले पनि रुसी क्षेत्रमा ड्रोन आक्रमण जारी राखेको छ। रुसी अधिकारीहरूका अनुसार युक्रेनबाट भएको ड्रोन आक्रमणमा समारा क्षेत्रमा घरहरूमा क्षति पुगेको छ। यी दाबीहरूलाई रयुटर्सले स्वतन्त्र रूपमा पुष्टि गर्न नसकेको जनाएको छ।

लगातारको हवाई आक्रमणले युक्रेनको नागरिक जीवन र अर्थतन्त्रमा समेत ठूलो असर पारेको छ। मिसाइल चेतावनीका कारण व्यवसाय तथा उद्योग बन्द गर्नुपर्ने अवस्थाले अर्थतन्त्रमा थप दबाब परेको उल्लेख छ।