धितोपत्र बोर्डद्वारा १७० दिनपछि अर्को आईपीओ स्वीकृत, हिम पर्वत हाइड्रोपावरले निकाल्ने भयो ५९ लाख कित्ता सेयर

काठमाडौं। नेपाल धितोपत्र बोर्डले १७० दिनपछि अर्को कम्पनीलाई आईपीओ निष्काशनको अनुमति दिएको छ। बोर्डको असोज १६ गते बसेको सञ्चालक समिति बैठकले हिम पर्वत हाइड्रोपावर लिमिटेडलाई आईपीओ निष्काशनका लागि स्वीकृति प्रदान गरेको हो।

बोर्डबाट स्वीकृति पाएसँगै कम्पनीले ५९ करोड १५ लाख रुपैयाँ बराबरको ५९ लाख १५ हजार कित्ता साधारण सेयर निष्काशन गर्न पाउने भएको छ। आईपीओ निष्काशन तथा बिक्री व्यवस्थापनका लागि सिटिजन्स क्यापिटललाई बिक्री प्रबन्धक तोकिएको छ।

हिम पर्वत हाइड्रोपावरले २०८१ मंसिर ५ गते आईपीओ निष्काशनको अनुमति माग्दै बोर्डमा आवेदन दिएको थियो। आवेदन दिएको करिब १७० दिनपछि कम्पनीले आईपीओ निष्काशनको स्वीकृति पाएको हो।

कम्पनीले ५.५ मेगावाट क्षमताको सागु खोला–१ र २० मेगावाट क्षमताको सागु खोला जलविद्युत आयोजना निर्माण सम्पन्न गरी २०८२ सालदेखि विद्युत उत्पादन गर्दै आएको छ। कम्पनीले विद्युत उत्पादनसमेत सुरु गरिसकेको र यसको नेटवर्थ १०० रुपैयाँभन्दा माथि रहेकाले आईपीओ निष्काशनका लागि अनुमति दिइएको हो।

अब कम्पनीले धितोपत्र दर्ता तथा निष्काशन नियमावलीमा तोकिएको व्यवस्थाअनुसार दर्ता दस्तुर बुझाएपछि बोर्डले अन्तिम स्वीकृति दिनेछ। त्यसपछि कम्पनीले आईपीओ निष्काशनको प्रक्रिया अघि बढाउन सक्नेछ।

यसअघि बोर्डका अध्यक्ष डा. गोपाल प्रसाद भट्टले एक सार्वजनिक कार्यक्रममा २०८३ असोज १५ गतेसम्ममा एउटा मात्रै नभई धेरै कम्पनीलाई आईपीओ निष्काशनको अनुमति दिइने बताएका थिए। तर, असोज १६ गते बोर्डले हिम पर्वत हाइड्रोपावरलाई मात्रै आईपीओ निष्काशनको अनुमति दिएको छ।

बोर्डले यसअघि वैशाख २ गते एभरेष्ट कलरलाई आईपीओ निष्काशनको अनुमति दिएको थियो। त्यसयता १७० दिनपछि मात्रै अर्को कम्पनीका रूपमा हिम पर्वत हाइड्रोपावरले आईपीओ निष्काशनको स्वीकृति पाएको हो।