दशकसम्म अलपत्र ठेक्कामा एक्सन, दुई निर्माण कम्पनीको सम्झौता रद्द

काठमाडौं । सडक मर्मत तथा निर्माणको जिम्मा लिएर लामो समयसम्म काम अलपत्र पार्ने दुई निर्माण कम्पनीको ठेक्का सम्झौता रद्द भएको छ। सडक डिभिजन कार्यालय विराटनगरले पटक–पटक निर्देशन र म्याद थप गर्दा पनि सन्तोषजनक प्रगति नगरेपछि काठमाडौंको ‘हिम सगरमाथा–बी एण्ड बी–आर वान जेभी’ र सुनसरीको ‘कृष्णा निर्माण सेवा’सँगको ठेक्का तोडेको हो।

कार्यालयका अनुसार सार्वजनिक खरिद ऐन, २०६३ बमोजिम असोज २२ गतेको निर्णयबाट दुवै ठेक्का अन्त्य गरिएको हो। यसअघि ठेकेदार कम्पनीलाई काम सुधार्न मौखिक तथा लिखित निर्देशन दिनुका साथै स्पष्टीकरणसमेत मागिएको थियो।

‘हिम सगरमाथा–बी एण्ड बी–आर वान जेभी’ले इटहरी–मावा खोला पुल खण्ड, इटहरी–सखुवागाछी सडक तथा धरान बेसक्याम्पदेखि भेडेटारसम्मको सडक मर्मतको जिम्मा पाएको थियो। पटक–पटक म्याद थपिए पनि अन्तिम म्याद २०८२ चैत ३० गतेसम्म काम सम्पन्न हुन सकेन।

त्यस्तै, ‘कृष्णा निर्माण सेवा’ले मोरङको तत्कालीन राजघाट ७–८ स्थित जारुवापानी होली कल्भर्ट निर्माणको ठेक्का पाएको थियो। उक्त कामको म्याद २०७३ चैत २८ गते नै सकिए पनि करिब एक दशकसम्म योजना अलपत्र रहेको थियो। ठेक्का रद्दसँगै कार्यालयले दुवै निर्माण व्यवसायीलाई ३० दिनभित्र सम्पर्क गरी वित्तीय फरफारक गर्न निर्देशन दिएको छ। तोकिएको अवधिमा सम्पर्कमा नआए थप कानुनी कारबाही गरिने जनाएको छ।