आरबीबीएल डिबेन्चर २०८९ को निष्कासन तथा बिक्री आजदेखि बन्द हुँदै

काठमाडौं । राष्ट्रिय वाणिज्य बैंक लिमिटेडले निष्कासन गरेको ७ वर्षे अवधिको वार्षिक ६ प्रतिशत ब्याजदर भएको ‘६ प्रतिशत आरबीबीएल डिबेन्चर २०८९’ ऋणपत्रको निष्कासन तथा बिक्री आज बैंकिङ समयपछि बन्द हुने भएको छ।

बैंकले गत असोज २९ गतेदेखि उक्त ऋणपत्रको निष्कासन तथा बिक्री खुला गरेको थियो। ऋणपत्रको प्रतिकित्ता अंकित मूल्य एक हजार रुपैयाँ रहेको छ।

बैंकले कुल ३ अर्ब रुपैयाँ बराबरको ३० लाख कित्ता ऋणपत्र निष्कासन गरेको हो। त्यसमध्ये १८ लाख कित्ता ऋणपत्रबाट १ अर्ब ८० करोड रुपैयाँ बराबरको रकम व्यक्तिगत तवर (प्राइभेट प्लेसमेन्ट)बाट बिक्री गरिनेछ। बाँकी १२ लाख कित्ता ऋणपत्रबाट १ अर्ब २० करोड रुपैयाँ बराबरको रकम सर्वसाधारणबाट जुटाइनेछ।

सर्वसाधारणका लागि छुट्याइएको १२ लाख कित्तामध्ये ५ प्रतिशत अर्थात् ६० हजार कित्ता ऋणपत्र सामूहिक लगानी कोषका लागि सुरक्षित गरिएको छ।

ऋणपत्रको निष्कासन तथा बिक्री प्रबन्धक कुमारी क्यापिटल लिमिटेड रहेको छ।