बीमालेख निरन्तर राख्न लोयल्टी बोनससहित आईएमई लाइफको नयाँ योजना

काठमाण्डौ । आईएमई लाइफ इन्स्योरेन्सले तोकिएको अवधिसम्म बीमालेख निरन्तर राख्ने बीमितलाई थप लाभ दिने गरी ‘आईएमई बिग सावधिक जीवन बीमा योजना’ सार्वजनिक गरेको छ। कम्पनीले लक्ष्मीपूजाको अवसर पारेर ल्याएको योजनामा नियमित बोनससँगै लोयल्टी बोनसको व्यवस्था गरेको हो।

कम्पनीका अनुसार बीमा अवधि पूरा हुँदासम्म बीमित जीवित रहे बीमाङ्क रकम, बोनस र लोयल्टी बोनस एकमुष्ट भुक्तानी हुनेछ। बीमा अवधिभित्र बीमितको मृत्यु भए बीमाङ्क रकम, बोनस र लोयल्टी बोनस बीमालेखका सर्तअनुसार भुक्तानी गरिनेछ।

२५ हजार रुपैयाँबाट सुरु हुने बीमाङ्क

योजना १८ देखि ६० वर्ष उमेर समूहका व्यक्तिले लिन सक्नेछन्। बीमा अवधि १० देखि २५ वर्षसम्म रहनेछ भने न्यूनतम बीमाङ्क २५ हजार रुपैयाँ तोकिएको छ। बीमालेख धितो राखेर कर्जा लिन सकिने सुविधा पनि योजनामा छ।

पूरक करारअन्तर्गत दुर्घटना मृत्यु लाभ, बीमाशुल्क मिनाहा, आम्दानी सुविधा, एकमुष्ट भुक्तानी र काजकिरिया खर्चसम्बन्धी थप सुविधा उपलब्ध हुने कम्पनीले जनाएको छ।

बीमालेख टिकाउन थप लाभ

आईएमई लाइफका प्रमुख कार्यकारी अधिकृत पवनकुमार खड्काका अनुसार दीर्घकालीन बचत र जीवन सुरक्षासँगै बीमालेखलाई निरन्तरता दिने बीमितलाई प्रोत्साहन गर्ने उद्देश्यले योजना ल्याइएको हो। कम्पनीले सार्वजनिक गरेको विवरणमा लोयल्टी बोनसको दर, त्यसको गणना विधि र अवधिअनुसार तिर्नुपर्ने बीमाशुल्क खुलाइएको छैन। एउटै बीमाङ्कका लागि पनि कति प्रिमियम तिर्नुपर्छ र अवधि पूरा हुँदा कति रकम हात पर्छ भन्ने बुझ्न यी विवरण महत्त्वपूर्ण हुन्छन्।