हिन्डनबर्गको रिपोर्टपश्चात अडाणी ग्रुपका सबै १० वटा कम्पनीको सेयरमूल्यमा गिरावट

काठमाण्डौ । अमेरिकी कम्पनी हिन्डनबर्गले भारतीय सेयर बजार नियामककी अध्यक्ष माधवी पुरी बुचमाथि गरेको खुलासाका कारण अडाणी ग्रुपको सबै कम्पनीको सेयरमूल्यमा गिरावट आएको छ । आज अडाणी ग्रुपका सबै १० वटा कम्पनीको सेयरमूल्य घटेको छ ।  

हिन्डनबर्गले गत शनिबार एक रिपोर्ट जारी गर्दै माधवी पुरी बुच र उनका पति धवल बुचको अडाणी ग्रुपसँग जोडिएका अफशोर कम्पनीमा स्वामित्व भएको जनाएको थियो ।  

यो प्रतिवेदनपश्चात आज अणडाी ग्रुपअन्तर्गतका अडाणी इन्टरप्राइजेज,अडाणी पोेटर््स,अडाणी ग्रीन इनर्जी,अडाणी टोटल ग्यास, अडाणी ईनर्जी सोलुसन्स्,अडाणी पावर,अडाणी विल्मर,अम्बुजा सिमेन्ट,एसीसी र एनडीटिभीको सेयरमूल्य ओरालो लागेका छन् । यी कम्पनीको सेयरमूल्यमा ६ प्रतिशतसम्मको उच्च गिरावट आएको छ ।  

तर हिन्डनबर्ग प्रतिवेदनको प्रभाव भारतीय सेयर बजारमा भने देखिएको छैन । इन्ट्रा डे कारोबारमा भारतको सेयर बजार सूचक सेन्सेक्स इनडेक्समा १७६ अंकको बढोत्तरीका साथ कारोबार भईरहेको भने निफ्टी५० पनि ४६ अंकले बढेको छ ।