चङ्गा, ड्रोन र बेलुन उडाउन नपाइने

काठमाण्डौ । त्रिभुवन अन्तर्राष्ट्रीय विमानस्थलको हवाई आवागमन हुने तथा आसपासको क्षेत्रमा चङ्गा, ड्रोन, वेलुन उडाउन नपाइने भएको छ । त्रिभुवन अन्तर्राष्ट्रिय विमानस्थल नागरिक उड्डयन कार्यालयले यो क्षेत्रमा चङ्गा, ड्रोन, वेलुन आदि उडाउन प्रतिबन्ध लगाएको छ ।  

कार्यालयले एक सूचना जारी गर्दै त्रिभुवन अन्तर्राष्ट्रीय विमानस्थलको हवाई आवागमन हुने तथा आसपासको क्षेत्रमा चङ्गा, ड्रोन, वेलुन उडाउने कार्य तथा लेजर लाईटले विमानको उडान सुरक्षामा गम्भीर असर पर्न सक्ने भएकाले यस किसिमका गतिविधि एवं क्रियाकलाप नगर्न नगराउन हुन आग्रह गरेको हो ।  

साथै, कसैले यस सूचनाको अवज्ञा वा अटेर गरी यस्ता गतिविधि गरे वा गराएको पाईएमा प्रचलित कानूनबमोजिक कडा कारवाही हुने सूचनामा उल्लेख छ ।