भारतको सेयर बजार निरन्तर ओरालो लाग्दै, हङकङ र जापानको भने वृद्धि

काठमाण्डौ । भारतको सेयर बजारको गिरावट आज पनि जारी रहेको छ । आज सेन्सेक्स इन्डेक्स ८०८ अंकले घटेर ८१ हजार ६८८ विन्दुमा सीमित बनेको छ ।  

यस्तै निफ्टी५० पनि २०० अंकले घटेर २५ हजार ४९ विन्दुमा झरेको छ । आज सेन्सेक्सका ३० वटा कम्पनीमध्ये २१ वटा कम्पनीको सेयरमूल्यमा गिरावट आएको छ । आज निफ्टीका ५० वटा कम्पनीमध्ये ३७ वटाको सेयरमूल्य घट्यो भने १३ वटाको बढ्यो ।  

आज आईटी सेक्टरबाहेक अन्य समूहमा गिरावट आयो । मिडियो समूह आज सर्वाधिक अर्थात २.५३ प्रतिशतले घट्यो । आज भारतको सेयर बजारमा विदेशी लगानीकर्ताले १५ हजार २४३ करोड भारुबराबरको सेयर बिक्री गरेका छन् ।  

अघिल्लो दिन पनि सेन्सेक्स १७६९ अंक र निफ्टी५० ५४६ अंकले घटेको थियो ।  

आज जापानको सेयर बजार मापक इन्डेक्स निक्की२२५ इन्डेक्स ०.२२ प्रतिशत अर्थात ८३ अंकले बढेको छ । यस्तै हङकङको हाङसेङ इन्डेक्स २.८२ प्रतिशत र कोरियाको कोस्पी इन्डेक्स ०.३१ प्रतिशतले बढेको छ ।