.gif)
.gif)
.png)
काठमाण्डौ । कांग्रेस–एमालेको गठजोडमा बनेको वर्तमान सरकार ढल्ने बेमौसमी बाजा पुनः बज्न थालेको छ ।
तथ्य जाँच नगरी हल्लाको पछि कुद्ने नेपालको सेयर बजारका लगानीकर्ताहरुलाई यो बेमौसमी बाजाले असर पार्न सुरु गरिसकेको छ । जसको प्रतिक्रिया दरिलो कारण र आधारबिना नै आज घटेको बजारले दिइसकेको छ ।
बजारलाई सुनियोजित रुपमा घटाउन विभिन्न गिरोहहरुले कांग्रेस–एमाले गठबन्धन सरकार ढल्ने हल्ला फैलाइरहेको देखिन्छ । फैलिँदो यो हल्लाको आगोमा माओवादीका शीर्ष नेताहरुले घिउ थपिरहेका छन् । तर, माओवादीका वर्षमान पुन लगायतका नेताहरुले जसरी सरकार तिहारअघि नै ढल्ने दाबी गर्दै प्रचारबाजी गरिरहेका छन्, यथार्थ भने त्यस्तो छैन । घटनाक्रम त्यसरी विकास नै नभएको कांग्रेसका एक पदाधिकारी तहका नेताले जानकारी दिए ।
(1).gif)
बिजशालासँग कुरा गर्दै ती नेताले नाम नखुलाउने आग्रहका साथ भने–‘शेरबहादुर दाई र केपी ओलीले नचाहेसम्म अहिलेको सरकार हल्लिदैन । यी दुईबाहेकका नेताहरु जति सबै लागेर सरकार ढाल्छु भने पनि ढल्दैन ।’
ती नेताको भनाईमा बाहिर चलेको हल्लाजस्तो तत्काल नै सत्ता समीकरणमा फेरबदलको झिनो गुञ्जायससम्म छैन । शक्तिकेन्द्रहरु भने सरकार ढाल्न र फेरि राजनीतिक अस्थिरता पैदा गर्न सबै प्रयास गरिरहेका सूचना आफूहरुलाई पनि आएको ती नेताले स्वीकारे । ‘तर जति नै ठूला शक्ति लागे पनि अहिलेको सरकार तत्काल ढल्दैन । हालको परिस्थितिमा कुनै गम्भीर ट्वीस्ट वा दुई ठूला नेताबीच कुनै अप्रत्यासित अविश्वासको अवस्था नआएसम्म यो सरकार सहमतिअनुसार नै जान्छ ।’ ती नेताले भने–‘केपी ओलीले अब १ वर्ष र केही महिनासम्म नेतृत्व गर्नुहुन्छ, त्यसपछि शेरबहादुर दाईको नेतृत्वमा सरकार बन्छ र त्यो सरकार आगामी चुनावसम्मै जान्छ ।’
एकाएक बालुवाटार किन त ?
सरकार धरमराउने व्यापक बजार हल्लाबीच कांग्रेसका सभापति शेरबहादुर देउवा महामन्त्री गगन थापा, गृहमन्त्री रमेश लेखक, पत्नी आरजू देउवालाई लिएर आइतबार साँझ एकाएक प्रधानमन्त्री निवास बालुवाटार किन पुगेका हुन् त ? कतै गठबन्धनमा गम्भीर समस्या आएर त हैन ? समीकरणमै दरार पैदा हुनै लागेको पूर्वसंकेत पो हो कि आजको अप्रत्यासित भेट ? भन्ने हाम्रो प्रश्नमा उच्च स्रोत भन्छ–‘सत्ता समीकरणको विषयमा छलफल गर्न उहाँहरु जानुभएको होइन । रवि लामिछाने पक्राउपछि जसरी देशभर सुरक्षा चुनौति बढेको छ, त्यसमा प्रहरी तथा प्रशासनका अधिकारीहरुले निर्वाह गरेको भूमिका शंकास्पद देखिएकोले त्यसको समाधान खोज्न छलफल भएको हो । केही सरकारी वकिल, महान्यायाधिवक्तादेखि केही उच्च सरकारी अधिकारीहरुको भूमिका शंकास्पद देखिएका कारण देउवा शीर्ष नेतृत्व लिएर ओलीलाई भेट्न जानुभएको हो । मुलुकमा शान्ति सुव्यवस्था कायम गर्न, अहिलेको गठबन्धनविरुद्ध भइरहेको षड्यन्त्रलाई मिलेर परास्त गर्न र लोकतन्त्रमाथि हुनसक्ने खतरालाई मिलेरै झेल्न आवश्यक रणनीति लगायतका विषयमा समेत छलफल भएको छ ।’
ती नेताका अनुसार आजको छलफलमा ओलीले दल विभाजन सम्बन्धी विषय समेत उठाएका थिए ।
ओली चाहिँ सशङ्कित !
कांग्रेसका शीर्ष नेताहरु अहिलेको गठबन्धनमा आफ्नो तर्फबाट कुनै समस्या नआउनेमा ढुक्क देखिएका भए पनि ओली भने दिनप्रतिदिन सशंकित बन्दै गएका घटनाक्रमले देखाउँछ । यहीकारण प्रधानमन्त्री ओलीले आफू अध्यक्ष समेत रहेको पार्टी नेकपा एमालेको आइतबारको सचिवालय बैठकमा सरकार ढाल्ने प्रयास भइरहेको र चौतर्फी आक्रमण भएको भन्दै सचेत रहन नेताहरुलाई आग्रह गरेका थिए ।
एमाले सचिवालयका एक सदस्यकाअनुसार देशी विदेशी शक्तिहरु समेत कांग्रेस–एमाले गठबन्धन फुटाउन सक्रिय भएको ओलीले सुनाएका थिए । ‘तपाईहरु पनि गम्भीर र सचेत हुनुपर्ने बेला आएको छ ।’ ओलीलाई उद्धृत गर्दै उनले भने–‘सरकार ढालेर फेरि अस्थिरताको बिउ रोप्ने प्रयासलाई सफल हुन दिनुभएन ।’
बैठकमा ओलीले कांग्रेस सभापति देउवा सहमति र समीकरणप्रति इमानदार नै भए पनि केही विदेशी शक्तिका कारण अवस्था बिग्रिनसक्ने चिन्ता समेत व्यक्त गरेका थिए ।
सो क्रममा ओलीले माओवादी अध्यक्ष प्रचण्ड र अन्य नेताहरु सरकारविरुद्ध हात धोएर लागेका र रवि लामिछाने सहकारी ठगी प्रकरणमा पक्राउ परेपछि चौतर्फी घेराबन्दी गरी जनतालाई सडकमा उरालेर सरकार ढाल्ने षड्यन्त्र बुन्न थालिएकोसम्म भन्न भ्याएका थिए ।
उनले मीनबहादुर गुरुङले पार्टीलाई दान दिएको जग्गाको विषयमा पार्टीभित्रैका नेताहरुले आफूमाथि प्रहार गरेका उल्लेख गर्दै त्यस्ताविरुद्ध कडा रुपमा प्रस्तुत हुनुपर्नेमा जोड दिएका थिए । यहीकारण विन्दा पाण्डे, उषाकिरण तिम्सिना र भीम रावललाई एमालेले स्पष्टीकरण सोध्ने निर्णय समेत आजैको बैठकले गरेको छ । यी तीनै नेताले कुनै व्यापारीबाट पार्टीले जग्गा दान लिनु गलत भएको भन्दै यसलाई सच्याउन सार्वजनिक आह्वान गरेका थिए ।
.png)
.jpg)
.jpg)
.jpg)
(1).gif)
.gif)
