ऋण तिर्न थ्रीस्टार हाइड्रोले १ः१ अनुपातमा हकप्रद निश्कासन गर्ने

काठमाण्डौ । थ्रीस्टार हाइड्रोपावर लिमीटेडले हाल कायम चुक्तापूँजीको सतप्रतिशत(१ः१)को अनुपातमा हकप्रद सेयर निश्कासनको निर्णय गरेको छ ।  

कम्पनीको कात्तिक ५ गते सोमबार दिनको ३ः३० बजे बसेको सञ्चालक समितिले हाल कायम चुक्तापूँजी ४९ करोड २५ लाखको १ः१ बराबरको हकप्रद सेयर निश्कासनको निर्णय गरेको हो ।  

कम्पनीले हकप्रद निश्कासनको प्रस्ताव स्वीकृतिका लागि विद्युत नियमन आयोगमा निवेदन दिने निर्णय समेत गरेको छ । 

हकप्रद सेयरको निश्कासनबाट प्राप्त रकमध्ये ३४ करोड २५ लाख रुपैयाँ आयोजना निर्माणका लागि लिएको बैंकको ऋण तथा अन्य दायीत्व भुक्तान गर्ने र बाँकी रहेको १५ करोड रुपैयाँ निको इनर्जी लिमीटेडबाट निर्माणधानी माथिल्लो भुरुण्डी ए जलविद्युत आयोजना(९ मेगावाट)मा आवश्यक स्वपूँजीमा लगानी गर्ने निर्णय समेत कम्पनीले गरेको छ । 

विद्युत नियमन आयोगबाट स्वीकृति आएपछि कम्पनीको आगामी वार्षिक साधारणसभाले अनुमोदन गरेपछि यो जलविद्युत कम्पनीले सतप्रतिशत हकप्रद निश्कासन गर्नेछ ।  

हाल दोश्रो बजारमा यो कम्पनीको अन्तिम कारोबार मूल्य प्रतिकित्ता ८६५ रुपैयाँ रहेको छ । हकप्रद निश्कासनको सूचना चुहिएका कारण यो कम्पनीको दोश्रोबजार सेयरमूल्य अगस्ट २८, २०२४ का दिन प्रतिकित्ता १२०० रुपैयाँभन्दा माथि पुगेको थियो ।