बैंकको राम्रो रिपोर्टको बजारमा किन चल्न सकेन जादू ? यस्तो छ विश्लेषकहरुको तर्क

काठमाण्डौं । आज वाणिज्य बैंक तथा केही विकास बैंकहरुले चालु आर्थिक वर्षको पहिलो त्रैमासिक प्रतिवेदन प्रकाशित गरेका छन् ।  

केहीबाहेकका बैंक तथा वित्तीय संस्थाहरुको पहिलो त्रैमासिक प्रतिवेदन लगानीकर्ताहरुले अपेक्षा गरेअनुसार नै आएको छ । तर सेयर बजारमा आज यसको जादू भने चलेन ।  

यसरी बजारले गति लिन नसक्नुमा केही बजार बिश्लेषकहरुले राजनीतिक अन्यौलता रहेको बताएका छन् । केहीले भने नाफा बुकका कारण आज बजारले गति लिन नसकेको प्रतिक्रिया दिएका छन् ।

खासगरी  पछिल्लो समय प्रधानमन्त्री केपी शर्मा ओलीले साना पार्टी फुटाउन नयाँ विधेयक ल्याउन खोजेको बिपक्षी पार्टीहरुले आरोप लगाउँदै आएका छन् । केही राजनीतिक दलले कार्तिक १० गतेबाट आन्दोलन गर्ने घोषणा पनि गरेका छन् । यहि कारणले लगानीकर्तामा अन्यौल रहँदा बजारले गति लिन नसकेको केही विश्लेषकको टिप्पणी रहेको छ ।  

नेपाल इन्भेष्टर्स फोरमका निवर्तमान अध्यक्ष छोटेलाल रौनियारको बिचारमा पनि राजनीतिक कारणले नै बजारले गति लिन नसकेको हो । उनी भन्छन्र-'वि लामिछानेको विषय र पोखरामा जारी आन्दोलनले बजारमा विश्वासको खडेरी पारिदियो । दसैंअगाडि बजार केही बढेको पनि थियो । त्यहीकारण आज बजारमा गिरावट आएको हो ।'

बैंक तथा वित्तीय क्षेत्रको रिपोर्ट सन्तोषजनक नै रहेको उनको बिचार छ । त्यसैले आज करेक्सन आएता पनि बजारले फेरि गति लिने उनको अनुमान छ । 

त्यसैगरी, सेयर लगानीकर्ता संघका कार्यबाहक अध्यक्ष तारा फुल्लेल पनि राजनीतिक बिषयले नै लगानीकर्ताहरुको मनोबल बढ्न नसकेको तर्क गर्छन् । उनको बिचारमा अब अर्थमन्त्रीले लगानीकर्तालाई सम्बोधन गरेर भए पनि मनोबल उकास्नुपर्नेछ । उनले थपे-'अहिले लगानीकर्ता राष्ट्रबैंकको मौद्रिक नीतिको समीक्षाको प्रतिक्षामा रहेका छन्, यसको प्रभाव पनि बजारमा देखिएको हुनसक्छ ।'  

धितोपत्र बोर्डमा अध्यक्ष नियुक्ति तथा मार्जिन कारोबारको व्यवस्था सरकारले गर्नुपर्ने पनि उनको बिचार छ । केही बढेको बजारमा आज करेक्सन आएको र यो स्वभाविक पनि रहेको उनको तर्क रहेको छ । अब बैक तथा वित्तीय संस्थाको रिपोर्ट क्रमिक रुपमा सुधारोन्मुख आउँदा लगानीकर्ताको मनोबल बढ्ने र बजारले गति लिने पनि उनको विश्वास छ ।