अपडेट : सागर ढकाल बने ब्रोकरका अध्यक्ष, बाँकी पदमा को-को आए ?

काठमाण्डौ । नेपाली सेयर बजारका ब्रोकरहरुको छाता संगठन स्टक ब्रोकर एशोसिएसन अफ नेपालको अध्यक्षमा सागर ढकालले बाजी मारेका छन् ।  

ढकालले १ मतको अन्तरले राजकुमार तिमिल्सिनालाई हराउँदै एशोसिएसनको अध्यक्षमा बाजी मारेका हुन् । 

मतगणनास्थलमा रहेका बिजशालाका वरिष्ठ संवाददाता अर्जुन तिमिल्सिनाकाअनुसार ९२ मतदातामध्ये ८८ मत खसेको थियो । जसमा सागर ढकालले ४५ मत प्राप्त गरे भने तिमिल्सिनाले ४३ मत ।  

ढकाल नेपालको पूँजीबजारमा नयाँ ब्रोकर हुन् ।

पछिल्लोपटक लाइसेन्स पाएका ब्रोकरहरुको नेतृत्व गर्दै उनले नयाँ संगठन बनाएका थिए । केही दिनअघि मात्रै नयाँ संगठन र पुरानोबीच मर्जर सम्पन्न भएको थियो ।

अध्यक्षमा ढकालले जित हासिल गरे पनि बाँकी पदहरुमा भने मिश्रित परिणाम आएको छ । 

उपाध्यक्षमा नितेशकुमार अग्रवालले जित हासिल गरेका छन् ।  

महासचिवमा भक्तिराम घिमिरे निर्वाचित भएका छन् भने सचिवमा विनय रेग्मी तथा कोषाध्यक्षमा मदन पौडेलले बाजी मारेका छन् ।  

निर्वाचित पदाधिकारीमध्ये सचिव विनय रेग्मीबाहेकका सबै सागर ढकाल प्यानलका हुन् ।  

कार्यसमिति सदस्यमा जेलिना पौडेल, प्रियान्सु अग्रवाल, जयन्त श्रीवास्तव, मदन पौडेल निर्वाचित भएका छन् । पौडेल र अग्रवाल तिमिल्सिना प्यानलका उम्मेद्वार हुन् ।