चीनमा विदेशी मोबाइलको बिक्रीमा ४७% को गिरावट, एप्पलमाथि दबाब

काठमाण्डौ । चीनमा विदेशी मोबाइल फोनको बिक्रीमा उल्लेख्य कमी आएको छ । गत शुक्रबार जारी गरिएको आँकडाअनुसार गत नोभेम्बर महिनामा चीनमा विदेशी ब्राण्डका मोबाइल फोनको बिक्रीमा ४७.४ प्रतिशतको गिरावट आएको देखिएको हो ।  

नोभेम्बर महिनामा चीनमा ३० लाख ४० हजार विदेशी मोबाइल फोन बिक्री भएका थिए । जुन सन् २०२३ को सोही अवधिको तुलनामा ४७.४ प्रतिशतले कम हो । यस्तै यो परिणाम गत वर्षको अक्टोबर महिनाको तुलनामा भने ५१ प्रतिशतले कम हो ।  

यो आँकडाले विश्वको सबैभन्दा ठूलो स्मर्टफोन बजार चीनमा एप्पललाई दबाब सिर्जना गरेको जनाइएको छ । चीनमा एप्पललाई स्थानिय ब्राण्डहरुसँग प्रतिष्पर्धा गर्न कठिनाई भईरहेको समेत जनाइएको छ ।  

अमेरिकाले प्रतिबन्ध लगाएको चिनियाँ ब्राण्ड हुवावेले सन् २०२३ मा पुनरागमन गर्दै उच्च प्रविधियुक्त मोबाइल लञ्च गरेको छ । यससँगै कम्पनी स्थानिय खरिदकर्ताबीच लोकप्रिय ब्राण्डका रुपमा स्थापित भएको छ ।  

एप्पलले गत सेप्टेम्बरमा लञ्च गरेको आईफोन १६ सिरिजले चिनियाँ बजारमा गति लिन सहयोग गर्ने विश्वास लिएको छ । कम्पनीले यी सिरिजमा एप्पल इन्टिलिजेन्स सफ्टवेयरमार्फत नयाँ एआई फिर्चस थप्ने प्रतिवद्धता जनाएको छ । यद्यपी चीनको एआईसँग सम्बन्धित कठिन नियम कानूनका कारण एप्पल इन्टिलिजेन्स चीनमा हालसम्म उपलब्ध हुन सकेको छैन ।