पाँच साता साइडवेज चलेको बजारमा यो साता बन्यो ‘बुलिस इन्गल्फिङ प्याटर्न’, कस्तो रहला आगामी यात्रा ?

काठमाण्डौ । यो साता सेयर बजारमा ५  दिन कारोबार भयो । ५ दिनमा बजार ४ दिन बढ्यो भने १ दिन मात्रै घट्यो । अघिल्लो  साता २ हजार ५८८.६२ विन्दुमा बन्द भएको बजार यो साता २ हजार ६५४.३५ विन्दुमा बन्द भयो  । यस हिसाबले यो साता ६५.७३ अंकले बजारमा बढोत्तरी आयो । अघिल्लो साता ४६.४७ अंकले बजारमा गिरावट आएको थियो । यो साता ५ कारोबारमा ३६  अर्ब ८ करोडबराबरको सेयर कारोबार भयो ।  

अघिल्लो साता ४ दिनको कारोबारमा २२ अर्ब ४० करोडबराबरको सेयर कारोबार भएको थियो । यस हिसाबले यो साता सूचक र काराबोर दुबै बढ्यो । यो साता बजार पूँजीकरण ४४ खर्ब पुग्यो । अघिल्लो साता बजार पूँजीकरण ४२ खर्ब ९३ अर्ब रहेको थियो  । यस हिसाबले यो साता बजार पूँजीकरण १ खर्ब ७ अर्बले बढ्यो ।  

प्राविधिक पक्षः  

प्राविधिक रुपमा यो साताको बजारलाई क्याण्डल स्टिक मार्फत नियाल्दा बुलिस इन्गल्फिङ प्यार्टन बनेको छ । यदि अघिल्लो रातो क्याण्डलाई पछिल्लो हरियो क्याण्डलले पुरै ढाक्छ भने त्यसलाई बुलिस इन्गल्फिङ भनिन्छ । यसबाट सम्भावित रुपमा बजारले माथिको यात्रा तय गर्न थालेको बुझिन्छ ।  

पछिल्लो पटकको बजारलाई साप्ताहिक रुपमा नियाल्दा बजार लगातार पाँच सातादेखि साइड वेज चक्र अर्थात २५८० देखि २६८० विन्दुसम्म चलेको देखिन्छ । यसरी साइडवेज चक्रमा चलेको बजारले यो साता बुलिस इन्गल्फिङ प्याटर्न बनाएको छ । यसले सम्भावित रुपमा आगामी साताबाट बजारले बुलिस यात्रा तय गर्न सक्ने सम्भावना रहन्छ ।  

मूभिङ एभरेजको आधारमा  

मूभिङ एभरेजको आधारमा यो साता बजार २१ दिने मूभिङ एभरेजबाट माथि लागेको छ । यसले पनि सम्भावित रुपमा बजारमा साइडवेज सकिदै गरेको बुझिन्छ । कारोबार तथा भोल्युमबाट नियाल्दा पनि यो साता औषत भोल्युम भन्दा बढी नै भोल्युम आएको छ ।  

बोलिङ्गर ब्याण्ड , म्याक्डी र आरएसआई  

बोलिङ्गर ब्याण्डको आधारमा डेली बेसमा बजारलाई नियाल्दा यो साताको अन्तिमा कारोबारमा अपर ब्याण्डमा प्रतिरोध सामना गरेको छ । यदि आगामी कारोबारमा अपर ब्याण्डसँगै हिडेको खण्डमा बजारले माथिको यात्रा तय गर्न सक्छ । म्याक्डीमा यसअघि नै बुलिस क्रसओभर बनेको छ । आरएसआई ओभर सोल्ड जोनबाट फर्केर हाल ५५ को तहमा पुगेको छ । समग्रमा सबै इन्डिकेटरबाट नियाल्दा बजारले बिस्तारै माथिको यात्रा तय गर्दै गरेको देखिन्छ ।  

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – २७३७

प्रतिरोध २ – २७०९

प्रतिरोध १–  २६८२

पिभट् प्वइन्टः २६०७

घटेमा सपोर्ट  

सपोर्ट १– २५६१

सपोर्ट २– २५३३

सपोर्ट  ३ –२४८६

निष्कर्षः अघिल्लो साता ४६ अंकले घटेको बजारमा यो साता करिब ६६ अंकको बढोत्तरी आयो । बजार बढ्दा यो साता कारोबार र भोल्युम पनि बढ्यो । लामो समय साइडवेज चलेको बजारमा यो साता अघिल्लो साताहरुको त्ुलनामा ठूलो र बुलिस क्याण्डल बन्यो । यसले सम्भावित रुपमा बजार आगामी साताबाट गति लिन सक्ने बुझिन्छ । इन्डिकेटरहरुबाट नियाल्दा पनि बजारले म्याक्डीमा बुलिस क्रसओभर बनेको छ । यस हिसाबले यो साता २ हजार ६५४ विन्दुमा बन्द भएको बजार यदि आगामी साता २ हजार ६८० विन्दुभन्दा माथि टिकेर कारोबार भएको खण्डमा बजारले माथिको यात्रा तय गर्न सक्नेछ ।  

क्षेत्रगत रुपमा बजारलाई हेर्दा यो साता वित्त समूह र सामूहिक लगानी कोषमा रातो पोतियो भने अन्य समूहमा हरियाली छायो । यो साता जीवन बीमा र अन्य समूहमा भने फराकिलो अंकले सूधार आयो ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।