नेप्सेले ‘अल टाइम हाई’ बनाउन सक्ने यस्ता छन ३ आधार, ‘म्याक्डीमा २३ सातापछि ‘बुलिस क्रसओभर’ बन्दै

काठमाण्डौ । यो साता पनि सेयर बजारमा ४ दिन कारोबार भयो । अघिल्लो साता पनि सेयर बजारमा ४ दिन नै कारोबार भएको थियो । यो साता ४ दिनमा बजार ४ दिन नै बढ्यो । अघिल्लो साता २ हजार ७४३.७४ विन्दुमा बन्द भएको बजार यो साता २ हजार ८१५.०४ विन्दुमा बन्द भयो  ।  

यस हिसाबले यो साता सेयर बजार ७१.३ अंकले बढ्यो ।  अघिल्लो साता पनि बजार ६५.२७ अंकले बढेको थियो ।  यो साता दोस्रो बजारमा ४ दिन कारोबारमा ४३ अर्ब ९३ करोडबराबरको सेयर कारोबार भयो । अघिल्लो साता पनि ४ दिनको कारोबारमा ३८ अर्ब ५८ करोडको सेयर कारोबार भएको थियो ।  

यस हिसाबले यो साता पनि दोस्रो बजारमा नेप्से परिसूचक र दैनिक औषत कारोबार दुवैमा बढोत्तरी आयो । यो साता बजार पूँजीकरण ४६ खर्ब ७४ अर्बको रह्यो ।  अघिल्लो साता यस्तो बजार पूँजीकरण ४५ खर्ब ५४ अर्ब भएको थियो । यस हिसाबले यो साता बजार बढ्दा नेप्सेमा १ खर्ब २० अर्बले बजार पूँजीकरण बढ्यो ।  

प्राविधिक पक्षः  

डाउ थेउरीको आधारमाः  

डाउ थेउरी चाल्र्स डाउले सन् १८९६ मा प्रतिपादन गरेको सिद्धान्त हो । उनले यो सिद्धान्तमा बजारको सूचक तथा कम्पनीको मूल्य एउटा निश्चित ट्रेन्ड र दिशा निर्धारणले गर्ने जनाउँछ । जसमा बुल मार्केट र बियर मार्केट भन्ने हुन्छ ।

बुल बजार  

बुल बजारमा पनि तीनवटा फेज हुने गर्छन् । जसले लगानीकर्ताहरुको चालचलनलाई जनाउने गर्छ । यसमा पहिलो भनेको ‘एक्युमुलेसन’ हुन्छ । यसमा कारोबार तथा भोल्युम बढ्ने गर्छ । दोस्रो भनेको ‘पब्लिक पार्टीसिपेशन’ हुन्छ । यसमा बजारले ठूलो मुभ लिन्छ । तेस्रो भनेको ‘एक्सेस् फेज’ हो । जसमा अनुभवि लगानीकर्ता बजारबाट निस्कन्छन् भने नयाँ निरन्तर बजार पस्ने गर्छन् ।  

बियर बजार  

बियर बजारमा पनि तीन वटै फेज हुने गर्छन् । यसमा पनि लगानीकर्ताको चालचलनलाई नै जनाइन्छ । जसमा पहिलो भनेको ‘डिस्ट्रिब्यूसन’ हो । यसमा विभिन्न सञ्चार माध्यमहरुबाट बजार खस्न थालेको समाचार प्रवाह हुने गर्छन् । दोस्रो भनेको ‘पब्लिक पार्टीसिपेशन’ नै हो । यसमा स्टप लसको लहर चलेको हुन्छ । तेस्रो भनेको प्यानिक अवस्था हो । यो समयमा लगानीकर्ताहरुमा कम्पनीको मुल्य तथा सूचक फर्कने आशा मरेको हुन्छ र लगानीकर्ता बजारबाट हराउने गर्छन् ।  

डाउ थेउरीमा हालको बजारको अवस्था कस्तो ?

हालको अवस्थामा बजार बुल नै हो । एक्युमुलेसन पछि पब्लिक पाटीसिपेसन पनि चल्दै गरेको  देखिन्छ । जसलाई पछिल्लो पटक कारोबारमा लगातार १० अर्बमाथि कारोबार आउनुले बजारमा एक्युमुलेसन सँगै पब्लिक पार्टीसिपेसन पनि चलेको बुझिन्छ । पछिल्लोपटक बजारले २५६० विन्दुमा सपोर्ट बनाए पछि २५८३ विन्दुमा हायर लो र २६६० विन्दुमा हायर हाई र अघिल्लो साता २५८० र २६२६ विन्दुमा हायर लो निश्चित गरेको थियो । तर यो साता  बजारले नयाँ हायर हाई बनाएर नेप्से २८१५ को विन्दुमा बन्द भएको छ । यसले बजार डाउ थेउरी वा प्राइस एक्सनबाट नियाल्दा बजार प्रष्ट रुपमा नै बुल कन्फर्मेसन दिएको छ ।  

बोलिङ्गर ब्याण्ड, म्याक्डी र आरएसआईको आधारमा  

साप्ताहिक रुपमा बजारलाई बोलिङ्गर ब्याण्डबाट नियाल्दा तिन सातादेखि मध्य ब्याण्डमा सपोर्ट लिएको बजारले यो साता अपर ब्याण्डमासँगै हिड्न खोजेको देखिन्छ । बोलिङ्गर ब्याण्डमा नै अपर ब्याण्ड र लोअर ब्याण्ड साँघुरिएको छ । यसले बजारले ट्रेन्ड परिवर्तन गर्न खोजेको देखिन्छ । साप्ताहिक रुपमा नै बजारलाई म्याक्डी मार्फत नियाल्दा २३ सातापछि बजारमा ब्ुलिस क्रसओभर बन्दै गरेको देखिन्छ ।  

हिस्टोग्राम छोटा–छोटा बन्दै गएका छन भने एमएसीडी लाइन र सिग्नल लाइनबीच बुलिस क्रसओभ बन्दै गरको देखिन्छ । यसअघि असोज ६ गते वियरिस क्रसओभर बनेको बजार हाल बुलिस बन्दै गरेको देखिन्छ । साप्ताहिक रुपमा आरएसआई पनि बजारले ५० को तहमा सपोर्ट लिएर माथिको यात्रा तय गर्दै गरेको देखिन्छ ।  

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ –२८१५

प्रतिरोध २ – २७५६

प्रतिरोध १–२७०४

पिभट् प्वइन्टः२६३५

घटेमा सपोर्ट  

सपोर्ट १– २५८८

सपोर्ट २– २५१९

सपोर्ट  ३ –२४७३

निष्कर्षः  यो सातासम्म बजार लगातार २ साता सुधार आयो । यो साता नेप्सेमा कारोबार र सूचक दुवैमा सुधार आयो । लामो समय साइड वेज चलेको बजारले यो साता २८ सय विन्दुमाथि बन्द भएको छ । प्राविधिक रुपमा बजारले यो साता नयाँ हायर हाई बनाएको छ । यस हिसाबले बजारले नयाँ हाई बनाउने तर्फ चलेका केही आधारहरु देखिन्छन् । जसमा हामीले अघिल्लो साता भने जस्तै पहिलो कारण भनेको कारोबार नै हो ।  

नेप्से बुल जानका लागि हालको बजारमा दैनिक औषत १० अर्बमाथि कारोबार आउनै पर्छ । यस्तो दैनिक औषत कारोबार यो साता झण्डै ११ अर्ब भएको छ । दोस्रो कारण भनेको बजारले बनाएको प्राइस एक्सनमा बनाएका हायर हाई र हायर लोका सिरिज नै हुन । तेस्रो भनेको आधारभूत रुपमा अधिक तरलतासँगै बजारमा सस्तो ब्याजदरको पैसा हो । यस हिसाबले जबसम्म बैंकको ब्याजदर डबल डिजिटमा जाँदैन त्यो बेलासम्म बजार बुल नै हो ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।