पूर्व सेबी प्रमुखविरुद्ध मुद्दा दर्ता गर्न आदेश, सेयर धोखाधडी र आर्थिक अनियमितता गरेको आरोप

काठमाण्डौ । मुम्बईको एक विशेष ‘एन्टी कर्प्सन कोर्ट’ले भारतको धितोपत्र बजार नियामक‘सेक्युरिटीज् एण्ड एक्सचेञ्ज बोर्ड अफ इण्डिया(सेबी)’ की पूर्व अध्यक्ष माधवी बुचविरुद्ध एफआईआर दर्ता गर्ने आदेश दिएको छ । सेयर बजार धोखाधडी तथा नियम उल्लंघन गरेको विषयमा अदालतले माधवीका साथै बम्बे स्टक एक्सचेञ्च(बीएसई) तथा सेबीका शीर्ष अधिकारीहरुविरुद्ध मुद्दा दर्ता गर्न आदेश दिएको हो ।  

यो आदेश न्यायधिश एसई बांगरले ठाणेका पत्रबार सपन श्रीवास्तवका तर्फबाट परेको उजुरीको आधारमा दिएका हुन् । सपनले सेबीमाथि कम्पनीको लिस्टिङमा ठूलो परिणाममा आर्थिक घोटाला तथा भ्रष्टाचार भएको आरोप लगाएका छन् ।

यसका साथै सेबी र कर्पोरेट संस्थाहरु मिलेर आर्थिक अनियमितता,इन्साइडर ट्रेडिङ तथा लिस्टिङपश्चात पब्लिक फण्डको अपचलन गरेको आरोप समेत लगाइएको छ ।  

सेबीले एक विज्ञप्ती जारी गर्दै मुम्बईको एसीबी अदालतको आदेशलाई चुनौति दिन छिट्टै नै उचित कदम चाल्ने जनाएको छ ।  

आरोपति सेबी पूर्वअध्यक्ष माधवी बुचले सन् १९८९ मा आईसीआईसीआई बैंकबाट आफ्नो करियरको सुरुवात गरेकी थिइन् । उनी सन् २००७ देखि २००९ सम्म आईसीआईसीआई बैंकको कार्यकारी निर्देशक थिइन् । यस्तै उनी सन् २००९ देखि २०११ मे सम्म बैंकको सुरक्षाको म्यानेजिङ डाइरेक्टर समेत रहेकी थिइन् ।

सन् २०११ मा उनी सिंगापुर गइन् र त्यहाँ उनले ग्रेटर प्यासेफिक क्यापिटलमा काम गर्न थालिन् । उनीसँग वित्त क्षेत्रमा ३० वर्ष काम गरेको अनुभव छ ।  

अमेरिकी कम्पनी हिन्डनबर्गले गत अगस्ट १९ मा एउटा प्रतिवेदन सार्वजनिक गरेको थियो । जसमा सेबी प्रमुख  माधवी बुच र उनका पति धवल बुचको अडाणी ग्रुपसँग जोडिएको अफसोर कम्पनीमा स्वामित्व भएको उल्लेख गरिएको थियो ।  

यस्तै माधवी बुचविरुद्ध भारतको कङ्ग्रेस पार्टीले समेत आईसीआईसीआई बैंक लगायत ३ ठाउँबाट तलब लिएको आरोप लगाएको थियो ।  

माधवी बुच गत २८ फेब्रुअरीमा सेबी प्रमुख पदबाट अवकाश भएकी थिइन् । उनको स्थानमा भारत सरकारले वित्त सचिव तुहिन कान्त पाण्डेलाई सेबीको नयाँ प्रमुख नियुक्त गरेको छ । तुहिन आगामी ३ वर्षसम्म यो पदमा रहने छन् ।