ओम मेगाश्री फर्मास्युटिकल्सको आईपीओ बाँडफाँड, १ लाख ४७ हजार ६ सय आवेदकले पाए १० कित्ता

काठमाण्डौ । ओम मेगाश्री फर्मास्युटिकल्स लिमिटेडको आईपीओ बाँडफाँड भएको छ । कम्पनीले आम सर्वसाधारणका लागि गत फागुन २७ गतेदेखि चैत ३ गतेसम्म निष्कासन गरेको आईपीओ आज बाँडफाँड भएको हो ।  

उक्त आईपीओ धितोपत्र बिक्री प्रबन्धक प्रभु क्यापिटलको कार्यालयमा आज बिहान बाँडफाँड भएको हो । उक्त आईपीओमा मागभन्दा बढी आवेदन परेका कारण गोलप्रथा विधिमार्फत बाँडफाँड भएको क्यापिटलले जनाएको छ ।  

क्यापिटलका अनुसार कम्पनीको आईपीओमा कुल २० लाख ५६ हजार ५७६ आवेदकबाट २ करोड ४५ लाख २९ हजार ५९० कित्ता सेयर खरिदका लागि आवेदन परेको छ ।  

यसमध्ये १८ लाख ४८ हजार २९८ आवेदन सदर भएको र २ लाख हजार ५२७ आवेदन बदर भएको क्यापिटलले जनाएको छ ।  

यसरी कुल सदर आवेदकबाट २ करोड १२ लाख ८२ हजार २४० कित्ता सेयरका लागि खरिद आवेदन परेको छ । कुल सदर आवेदकमध्ये १ लाख ४७ हजार ६०० जनालाई १० कित्ताका दरले १४ लाख ७६ हजार कित्ता सेयर बाँडफाँड गरिएको छ ।  

कम्पनीले निष्कासनका लागि अनुमति पाएको कुल १८ लाख कित्ताको १० प्रतिशत अर्थात रु.१०० अंकित दरका १ लाख ८० हजार कित्ता सेयर श्रम स्वीकृति लिई वैदेशिक रोजगारीमा रहि रहेका नेपाली नागरिकहरुको लागि,३ प्रतिशतले हुने ५४ हजार कित्ता सेयर कम्पनीमा कार्यरत कर्मचारीहरुको लागि र ५ प्रतिशतले हुने ९० हजार कित्ता सेयर सामुहिक लगानी कोषको लागि छुट्टाई आम सर्वसाधारणका लागि १४ लाख ७६ हजार कित्ता आईपीओ जारी गरेको थियो ।