टिकटक बेचे ट्यारिफ कटौती गर्ने चीनलाई ट्रम्पको प्रस्ताव

काठमाण्डौ । अमेरिकी राष्ट्रपति डोनाल्ड ट्रम्पले सर्ट भिडियो एप टिकटक बेच्न चीनलाई प्रस्ताव गरेका छन् । ट्रम्पले टिकटक बेच्ने सम्झौता सुनिश्चित गर्न चीनमा लगाइएको ट्यारिफ कटौती गर्नसक्ने बताएका छन् ।  

ट्रम्पले टिकटकलाई गैर–चिनियाँ खरिदकर्ता खोज्न अप्रिल ५ सम्मको म्याद थप्न तयार रहेको समेत बताएका छन्। यसअघि बाइडेन प्रशासनमा टिकटकमाथि प्रतिबन्ध लगाउने कानून पारित भएको थियो । तर, जनवरीमा ट्रम्प सत्तामा आएपछि यो कानून लागू गर्न ढिलाइ भयो।

यो कानून सन् २०२४ मा बनेको थियो। यसलाई बेच्न वा प्रतिबन्ध लगाउनको लागि राष्ट्रिय सुरक्षालाई उद्धृत गरिएको थियो।  ट्रम्पले बुधवार पत्रकारहरूलाई भने, ‘चीनले टिकटकका सम्बन्धमा भूमिका खेल्नुपर्छ। मलाई लाग्छ उनीहरूले यसो गर्नेछन्। यसका लागि ट्यारिफ अलि कम गर्न सकिन्छ ।– ट्रम्पले अप्रिल ५ सम्मको समयसीमाभित्र यस विषयमा सम्झौताका लागि ढाँचा तयार हुने आशा राखेको पनि बताएका छन् ।