रुसबाट तेल खरिद गर्न राष्ट्रहरुलाई ५०% ट्यारिफ लगाउने ट्रम्पको चेतावनी

काठमाण्डौ । अमेरिकी राष्ट्रपति डोनाल्ड ट्रम्पले रुसबाट तेल खरिद गर्न राष्ट्रहरुलाई ५० प्रतिशत ट्यारिफ लगाउने चेतावनी दिएका छन् । रुसले युक्रेनसँग युद्धविराममा सहमति नजनाए रुसबाट तेल खरिद गर्ने देशहरुलाई ट्यारिफ लगाउने ट्रम्पले चेतावनी दिएका हुन् ।  

ट्रम्पले भने, ‘यदि रुस र म युक्रेनमा रक्तपात रोक्ने सहमतिमा पुग्न सकेनौं र मलाई लाग्छ कि यो रुसको गल्ती हो भने, म रुसबाट आउने सबै तेलमा अतिरिक्त शुल्क लगाउनेछु।’

ट्रम्पको भनाइमा अमेरिकी राष्ट्रपतिको कार्यालयबाट कुनै प्रतिक्रिया आएको छैन । ट्रम्पले एनबीसी न्यूजसँगको अन्तर्वार्तामा आफू रुसी राष्ट्रपति भ्लादिमिर पुटिनसँग निकै रिसाएको र दुखी भएको समेत बताएका छन् । ट्रम्पले पुटिनले युक्रेनी राष्ट्रपति भोलोडिमिर जेलेन्स्कीको विश्वसनीयतामाथि आक्रमण गरेको बताएका छन् ।

युक्रेनमा युद्धविरामका लागि वार्ता गर्दा ट्रम्प पुटिनसँग धेरै नजिक भएकोमा युरोपेली नेताहरू चिन्तित थिए। तर, विगत ६ हप्तामा ट्रम्पले जेलेन्स्कीमाथि बारम्बार कडा माग गरेका छन् र पुटिनको पक्षमा धेरै बयान दिएका छन् ।

एनबीसी न्यूजका अनुसार ट्रम्पले १० मिनेटको फोन अन्तर्वार्तामा पुटिनले जेलेन्स्कीको विश्वसनीयतामाथि आक्रमण गरेकोले आफू रिसाएको र दुखी भएको बताए ।

तर, ट्रम्प आफैंले जेलेन्स्कीलाई तानाशाह भनेका थिए र उनीसँग चुनावको माग गरेका थिए ।