ट्यारिफको निर्णय फिर्ता लिन अमेरिकालाई चीनको अपिल, नभए कडा कदम चाल्ने चेतावनी

काठमाण्डौ । चीनको वाणिज्य मन्त्रालयले अमेरिकालाई यी एकतर्फी लगाइएका करहरू तत्काल फिर्ता लिन र आफ्ना साझेदारहरूसँग मिलेर व्यापारसम्बन्धी विवादको उचित समाधान वार्ताबाट निकाल्न आग्रह गरेको छ।

वाणिज्य मन्त्रालयका प्रवक्ताले चीनले यस निर्णयको कडा विरोध गर्ने बताएका छन् । उनले आफ्नो अधिकार र हितको रक्षा गर्न कडा कदम चाल्ने समेत बताए।  

यसअघि चीनको आधिकारिक समाचार एजेन्सी सिन्ह्वाले अमेरिकाले लगाएको शुल्कबारे टिप्पणी गरेको थियो।

समाचार एजेन्सी सिन्ह्वाले ट्रम्पले व्यापारलाई ‘बदलाको युद्ध’ बनाएको बताएको छ । ट्रम्पको ट्यारिफ घोषणाको सबैभन्दा ठूलो असर चीनमा परेको छ किनभने अब सबै चिनियाँ सामानमा ३४ प्रतिशत बढी कर लगाइएको छ ।

यसअघि मार्च ४ मा अमेरिकाले चीनबाट आउने सामानमा २० प्रतिशत कर लगाएको थियो । अमेरिकी राष्ट्रपति डोनाल्ड ट्रम्पले करवृद्धिको घोषणा गरेपछि एसियाली मुलुकहरु निकै प्रभावित भएका छन् । ट्रम्पले चीनमा ३४ प्रतिशत, भियतनाममा ४६ प्रतिशत र कम्बोडियामा ४९ प्रतिशत कर लगाएका छन् ।