ट्रम्पले वाल्ट्जलाई राष्ट्रिय सुरक्षा सल्लाहकारबाट हटाए, युएनको पदका लागि मनोनित

काठमाण्डौ । अमेरिकी राष्ट्रपति डोनाल्ड ट्रम्पले ह्वाइट हाउसका राष्ट्रिय सुरक्षा सल्लाहकार माइक वाल्ट्जलाई पदबाट हटाएका छन् । ट्रम्पले माइक वाल्ट्जलाई राष्ट्रिय सुरक्षा सल्लाहकारको पदबाट हटाएर संयुक्त राष्ट्रसंघका लागि राजदूतमा मनोनयन गर्ने भएका छन् ।

सामाजिक सञ्जालमा एक पोस्टमा, ट्रम्पले वाल्ट्जलाई उनको कामको लागि धन्यवाद दिदैं अस्थायी रूपमा राज्य सचिव मार्को रुबियोलाई उनको स्थानमा राख्ने जानकारी दिएका छन् ।  

गल्तीले एक पत्रकारलाई संवेदनशील सैन्य योजनाहरू छलफल हुने च्याट समूहमा जोडेपछि वाल्ट्जले चर्को आलोचनाको सामना गर्नु परेको थियो ।  

माइक वाल्ट्ज एक राजनीतिज्ञ साथै व्यापारी, लेखक र पूर्व सेना अधिकारी समेत हुन्। उनलाई जनवरी २०२५ मा राष्ट्रपति डोनाल्ड ट्रम्पको राष्ट्रिय सुरक्षा सल्लाहकारको रूपमा मनोनीत गरिएको थियो। उनी २०१९ देखि २०२५ सम्म फ्लोरिडाको छैठौं कंग्रेसनल डिस्ट्रिक्टका लागि अमेरिकी प्रतिनिधि थिए। उनी कांग्रेसमा निर्वाचित हुने पहिलो आर्मी स्पेशल फोर्सका सैनिक थिए ।  

वाल्ट्जलाई चीनको बारेमा कांग्रेसको सबैभन्दा आक्रामक सदस्य मानिन्छ। चिनियाँ कम्युनिष्ट पार्टी (सीसीपी) अमेरिकासँग शीतयुद्धमा रहेको उनको विश्वास छ । २०२१ मा, वाल्ट्ज कंग्रेसका पहिलो सदस्य थिए जसले बेइजिङमा २०२२ शीतकालीन ओलम्पिकको पूर्ण अमेरिकी बहिष्कारको लागि आह्वान गरेका थिए । जसलाई उनले चिनियाँ उइघुर जनसंख्याको नरसंहार र नजरबन्द र चीनमा जातीय अल्पसंख्यकहरूको दासत्व, जबरजस्ती श्रम र नजरबन्द शिविरको रूपमा वर्णन गरेका थिए।