आईपीओ निश्कासन प्रक्रिया छोट्याउने गृहकार्यमा सेबोन

काठमाण्डौ ।  नेपाल धितोपत्र बोर्ड(सेबोन)ले कम्पनीहरुको साधारण सेयरको प्राथमिक निश्कासन(आईपीओ)को प्रक्रियालाई छोट्याउने गृहकार्य थालेको छ ।  

धेरै कम्पनीहरुको आईपीओ पाइपलाइनमा रहेको र तिनको स्वीकृतिलाई पनि तीव्र पार्नुअघि सेबोनले समग्र प्रक्रियालाई नै छोट्याउने गृहकार्य थालेको हो । 

यही नीतिअन्तर्गत केही दिनभित्रै आईपीओ खरीदका लागि वैदेशिक रोजगारीमा रहेका नेपाली नागरिकहरुले आवेदन दिनका लागि पाउने अवधिलाई छोट्याउने तयारी भइरहेको छ ।

हालको व्यवस्थाअनुसार, वैदेशिक रोजगारीमा रहेका नेपाली नागरिकहरूले आईपीओ (प्राथमिक शेयर निष्कासन) भर्नका लागि कम्तीमा १५ दिनको आवेदन अवधि पाउँछन् । सेबोनले धितोपत्र निष्कासन तथा बाँडफाँड निर्देशिकाको छैटौं संशोधनमार्फत गरेको यो व्यवस्था पुनः संसोधन गर्न लागेको हो ।

बोर्डस्थित स्रोतकाअनुसार १५ दिनसम्म आवेदन दिन पाउने व्यवस्थालाई छोट्याएर ५ दिनमा झार्ने गरी गृहकार्य थालिएको छ । '१५ दिनको यो अवधिलाई ५ दिनमा झार्दा मात्रै पनि आईपीओको प्रक्रिया छोट्टिन सहज हुने देखियो ।' स्रोतले भन्यो -'यो व्यवस्था चाँडै कार्यान्वयनमा आउनेछ ।'  

नेपाल धितोपत्र बोर्डको निर्देशिका अनुसार, कम्पनीहरूले सर्वसाधारणका लागि आईपीओ निष्कासन गर्दा, वैदेशिक रोजगारीमा रहेका नेपाली नागरिकहरूका लागि कम्तीमा १० प्रतिशत शेयर आरक्षित गर्नुपर्ने व्यवस्था गरिएको छ । सर्वसाधारणका लागि आईपीओ जारी गर्नुअघि वैदेशिक रोजगारीमा रहेका नेपाली नागरिकहरुका लागि जारी गर्ने गरिन्छ।