अल्पकालीनलाई ५% र दीर्घकालीनलाई ३% लाभकर कायम गर्ने लगायत लगानीकर्ताका ११ बुँदे माग सेबोनमा

Capital Market
शुक्रबार, चैत्र २,२०८० 18:46:53

काठमाण्डौ । विभिन्न लगानीकर्ता संघ संगठनले पुँजी बजारको समस्या समाधान तथा यो क्षेत्रको विकास र विस्तारका लागि शुक्रबार सुझाव बुझाएका छन् ।

अघिल्लो साता अर्थमन्त्री बर्षमान पुनले बजार सुधार र विकासको बिषयमा सरोकारवालहरुसँग समेत छलफल गरी कार्ययोजना पेश गर्न बजारको प्रमुख नियामक नेपाल धितोपत्र बोर्ड, नेप्से र सिडिएससीलाई निर्देशन दिएका थिए ।

यसै बिषयमा केन्द्रित रहेर धितोपत्र बोर्डले विभिन्न सरोकारवालासँग सुझाव मागेर एकीकृत कार्ययोजना बुझाउने तयारीलाई तीव्रता दिएको छ । यही क्रममा शुक्रबार नेपाल सेयरधनी संघले बोर्डका निमित्त अध्यक्ष डा. नवराज अधिकारीलाई भेटेर बजार सुधारको विषयमा आफ्ना ११ बुँदे सुझाव पेश गरेको हो ।

जसमा अल्पकालीन र दीर्घकालीन लगानीकर्ता छुट्टाएर अल्पकालीन लगानीकर्ताहरुलाई ५ प्रतिशत र दीर्घकालीन लगानीकर्ताहरुका लागि ३ प्रतिशत लाभकर बनाउने , धितोपत्र कमिशन घटाउने, कर्जाको ब्याज एकल अंकमा ल्याउने, ब्रोकरमार्फत मार्जिन ल्याण्डिङ कार्यान्वयनमा ल्याउने, सबै धितोकर्जाको जोखिम भार घटाएर १०० प्रतिशतमा ल्याउने, धितोपत्र बजारमा लामो समयदेखि रिक्त अध्यक्ष यथासक्य छिटो नियुक्ति गर्ने, बजारको दायरा फराकिलो बनाउने, विभिन्न नियमन निकायबीच समन्वयकारी नीति लिनुपर्ने जस्ता माग रहेका छन् ।

भेटमा सक्रिय लगानीकर्ता प्रकाश रजौरे, कमलराज अधिकारी र घनश्याम पाण्डे लगायतको सहभागिता थियो ।