जेन-जी आन्दोलनले बन्द सेयर बजार खोल्ने सेबोनको निर्णय

काठमाण्डौ । नेपाल धितोपत्र बोर्ड(सेबोन)ले सेयर बजारमा कारोबार सुचारु गर्ने निर्णय गरेको छ ।  

सेबोनको मंगलबार बिहान बसेको सञ्चालक समितिको बैठकले जेनजी आन्दोलनका कारण बन्द गरिएको सेयर बजार खोल्ने निर्णय गरेको हो । 

नेपाल स्टक एक्सचेञ्ज लिमीटेड(नेप्से)ले सेयर कारोबार असोज १ गतेदेखि सुचारु गर्ने व्यवस्थाका लागि अनुमति माग्दै सोमबार सेबोनलाई पत्र पठाएको थियो । नेप्सेको सोही आवेदनलाई आधार मानेर सेयर कारोबार खोल्ने निर्णय भएको बोर्डस्थित स्रोतले जानकारी दिएको छ ।  

यो निर्णयसँगै असोज २ गतेदेखि सेयर कारोबार खुल्नेछ । असोज १ गते सार्वजनिक विदा परेकोले सो दिन कारोबार हुनेछैन । 

असोज २ गतेदेखि खुल्ने सेयर बजारको कारोबार साबिकको व्यवस्थाअनुसार नै पूरा समय खुल्नेछ ।  

आंशिक कारोबार मात्र गर्ने वा सर्किट ब्रेकर सम्बन्धी नियममा केही परिवर्तन गरेर सुरक्षित ढंगले बजार सुचारु गर्ने पक्षमा धितोपत्र बोर्ड रहे पनि नेप्से त्यसको पक्षमा नआउँदा साबिककै व्यवस्थाअनुसार नै बजार खोल्ने निर्णय भएको स्रोतको भनाई छ।  

यसअघि प्रकाशित सम्बन्धित समाचारहरु :

सेयर कारोबार चाँडै खोल्ने/नखोल्ने विषयमा निर्णय गर्न सेबोनले मंगलबार बोलायो बोर्ड बैठक