विवाहको मौसम सुरु भएसँगै आकाशियो सुनको भाउ, चाँदीको मूल्य हालसम्मकै उच्च

काठमाण्डौ । अन्तर्राष्ट्रिय बजारमा सुनको मूल्य पछिल्लो दुई साताकै उच्च कायम भएको छ । पछिल्लो कारोबारमा सुनको मूल्य १.५१ प्रतिशत अर्थात ६२.९१ डलरले बढेको छ ।

यो वृद्धिसँगै सुनको मूल्य प्रतिऔंस ४ हजार २१९ डलर कायम भएको छ ।

आगामी महिना अमेरिकी केन्द्रीय बैंकले ब्याजदरमा काटछाट गर्न सक्ने सम्भावनाका कारण सुनको माग बढ्न गई मूल्यमा बढोत्तरी देखिएको हो । न्यून ब्याजदरमा प्रायः सुनको मूल्य वृद्धि हुने गर्दछ । गत साता प्रमुख एशियाली बजारमा सुनको माग ह्वात्तै बढेको रोयटर्सले जनाएको छ । सुनको सर्वाधिक खपतकर्ता देशमध्ये एक भारतमा विवाहको मौसम सुरु भएसँगै सुनको माग बढेको छ ।

यस्तै चीनमा सुनको खरिदमा लाग्दै आएको करमा छुटको व्यवस्थाले सुनप्रति चिनियाँ ग्राहकको मोह बढेको छ ।

पछिल्लो कारोबारमा चाँदीको मूल्य भने ऐतिहासिक उचाईमा पुगेको छ । चाँदीको मूल्य ६.२४ प्रतिशत अर्थात ३.३२ डलरले बढेर प्रतिऔंस ५६.७२ डलरमा कारोबार भईरहेको छ । यो मूल्य हालसम्मकै उच्च हो । गत एक महिनाको अवधिमा चाँदीको मूल्य १६.६ प्रतिशतले वृद्धि भईसकेको छ ।