एलन मस्क सन् २०२६ मा विश्वका पहिलो ट्रिलियनेयर बन्ने !

काठमाण्डौ । टेस्ला र स्पेसएक्सका संस्थापक एलन मस्क सन् २०२६ मा विश्वका पहिलो ट्रिलियनेयर बन्ने अनुमान गरिएको छ। 

ब्लूमबर्ग बिलियनेयर इन्डेक्सका अनुसार हाल मस्कको कुल सम्पत्ति ४६५ अर्ब अमेरिकी डलर छ। स्पेसएक्सको आगामी ठूलो आईपीओले उनको सम्पत्तिलाई एक ट्रिलियन डलरभन्दा माथि पुर्‍याउने विश्लेषकहरूले बताएका छन्।

मस्कले नै पुष्टि गरेअनुसार स्पेसएक्स सन् २०२६ मा सार्वजनिक कम्पनी बन्दै स्टक बजारमा सूचीकृत हुनेछ। यो आईपीओ विश्वकै सबैभन्दा ठूलो हुने अपेक्षा छ। कम्पनीको मूल्यांकन १.५ ट्रिलियन डलरसम्म पुग्ने अनुमान गरिएको छ। यसमा मस्कको हिस्सा करिब ६२५ अर्ब डलरको हुने प्रक्षेपण छ, जसले उनको कुल सम्पत्तिलाई एक ट्रिलियन डलर नाघ्नेछ।

हाल स्पेसएक्स विश्वको सबैभन्दा मूल्यवान निजी कम्पनी हो। सेकेन्डरी सेयर बिक्रीमा यसको मूल्यांकन ८०० अर्ब डलरभन्दा माथि पुगिसकेको छ। यदि कम्पनीले ५ प्रतिशत सेयर मात्र बिक्री गरेमा पनि करिब ४० अर्ब डलर संकलन हुनेछ, जुन साउदी अराम्कोको २०१९ को २९ अर्ब डलरको रेकर्डलाई उछिनेर विश्वकै सबैभन्दा ठूलो आईपीओ बन्नेछ।

यसअघि जनवरी २०२५ मा ओक्सफामले जारी गरेको प्रतिवेदनले पनि यो दशकभित्र कम्तीमा पाँच जना अर्बपति ट्रिलियनेयर बन्ने अनुमान गरेको थियो। प्रतिवेदनअनुसार एलन मस्कले सबैभन्दा चाँडो (पाँच वर्षभित्र) यो कीर्तिमान हासिल गर्नेछन्। त्यसपछि जेफ बेजोस, मार्क जुकरबर्ग, ल्यारी एलिसन र बर्नार्ड अर्नाल्ट पनि ट्रिलियन डलर क्लबमा प्रवेश गर्ने प्रक्षेपण गरिएको छ।

विश्वका धनाढ्यहरूको सम्पत्ति तीव्र गतिमा बढिरहेका बेला मस्कको यो सम्भावित कीर्तिमानले फेरि एकपटक उनलाई विश्वव्यापी चर्चाको केन्द्रमा ल्याएको छ।