डलर कमजोर बन्दा सुनको मूल्यमा ३६ डलरको बढोत्तरी

काठमाण्डौ । अन्तर्राष्ट्रिय बजारमा सुनको मूल्य बढेको छ । आजको कारोबारमा सुनको मूल्य ०.७० प्रतिशत अर्थात ३६.१६ डलरले बढेको छ ।

यो समाचार तयार पार्दासम्म सुनको मूल्य प्रतिऔंस ५ हजार १९४ डलर कायम भएको छ ।

अमेरिकी डलर कमजोर हुनुका साथै अमेरिकी ट्यारिफ नीतिसम्बन्धी अनिश्चितता र अमेरिका–इरान वार्ताको पृष्ठभूमिमा सुरक्षित लगानीको माग बढ्दा बिहिबार सुनको मूल्यमा वृद्धि देखिएको हो।

विश्लेषकहरुका अनुसार हालको मूल्यवृद्धि नयाँ ट्यारिफ नीतिसम्बन्धी अनिश्चितता, भू–राजनीतिक तनाव र कमजोर डलरको पुनर्मूल्यांकनको परिणाम हो। बजारले भू–राजनीतिक घटनाक्रम, डलरको उतारचढाव, सम्भावित ट्यारिफ परिवर्तन र मौद्रिक नीतिसम्बन्धी अन्योललाई आत्मसात गरिरहेकाले निकट अवधिमा दुईतर्फी समायोजन जारी रहने सम्भावना रहेको उनीहरुको तर्क छ ।

एनभिडिया जस्ता दिग्गज टेक कम्पनीको अपेक्षाभन्दा राम्रो आम्दानी विवरण सार्वजनिक भएपछि लगानीकर्ताको विश्वास बढेको छ, जसले डलरमा दबाब सिर्जना गरेको छ। यसैबीच, अमेरिकी व्यापार प्रतिनिधि जेमिसन ग्रिरले केही देशका लागि ट्यारिफ दर हालै लागू गरिएको १० प्रतिशतबाट बढाएर १५ प्रतिशत वा सोभन्दा माथि पुर्‍याइने जानकारी दिएका छन्, यद्यपि प्रभावित देशहरूको नाम खुलाइएको छैन।

डलर कमजोर हुँदा अन्य मुद्राका धारकका लागि डलरमा मूल्यांकन गरिने सुन सस्तो पर्न जाने भएकाले माग बढ्ने गर्दछ।

बजार विश्लेषकहरूका अनुसार उता फेडरल रिजर्भले यस वर्ष तीन पटकसम्म २५ आधार अंकका दर कटौती गर्न सक्ने अपेक्षा गरिएको छ। यस सम्बन्धमा थप संकेतका लागि साप्ताहिक बेरोजगारी दाबीसम्बन्धी तथ्यांक प्रतीक्षामा रहेको छ।

यस्तै आज चाँदीको मूल्य पनि २.२४ प्रतिशत अर्थात १.९६ डलरले बढेर प्रतिऔंस ८९ डलरमा कारोबार भईरहेको छ ।