जम्माजम्मी ३ मिनेट कारोबार भएको बजारमा के–के भयो ? कुन समूहको प्रदर्शन कस्तो रह्यो ?

काठमाण्डौ । रास्वपाको एकल र प्रचण्ड बहुमतको सरकार बन्ने भएपछि सेयर बजारका लगानीकर्ता उत्साहित देखिएका छन् । यसैको प्रतिबिम्ब चुनावपछि सोमबार(आज) खुलेको सेयर कारोबार देखिएको छ ।  

चुनावपछि खुलेको बजारमा लगातार तीनवटा पोजिटिभ सर्किट ब्रेकर लगाउनुपर्यो र जम्माजम्मी ३ मिनेट कारोबार गरेर बजार बन्द गर्नुपर्यो । 

बजार खुलेलगत्तै ४ प्रतिशतले नेप्से बढेपछि सर्किट ब्रेक लगाई नेप्सेले २० मिनेटका लागि कारोबार स्थगन गरेको थियो । त्यसपछि खुलेको बजारमा फेरि अर्को मिनेटमा ५ प्रतिशतले नेप्से बढेपछि दोश्रो सर्किट लाग्यो र कारोबार ४० मिनेटका लागि स्थगित भयो । त्यसपछि खुलेको बजारमा फेरि १ मिनेट नपुग्दै ६ प्रतिशतले नेप्से बढेपछि आजको दिनभरका लागि कारोबार नै निलम्बनमा परेको छ ।  

लगातार तीनवटा सर्किटपछि बन्द भएको सेयर बजार अब भोलि मात्र खुल्नेछ । भोलि(मंगलबार) पनि बजारमा सर्किटहरु लाग्ने धेरैको दाबी छ ।  

सोमबार उछालको गतिमा दौडिएको नेप्से परिसूचक ३ मिनेटको कुल कारोबारमा १६३ अंकले बढेर २८७५ को विन्दूमा पुग्यो । 

यो दिन बजारमा २५३ कम्पनीको सेयर किनबेच भयो, जसमध्ये २५२ कम्पनीको मूल्य उछालको गतिमा बढ्यो भने एउटा कम्पनी रिलायन्स स्पिनिंग मिल्सको मूल्य मात्र घट्न पुग्यो । रिलायन्सको सेयर १० कित्ता कारोबार भयो र मूल्य प्रतिकित्ता १०.२० रुपैयाँले घट्यो ।  

यो तीन मिनेटमा व्यापार समूह सबैभन्दा बढी ७.७३ प्रतिशतले बढ्यो भने लगानी समूहमा ७.०६ प्रतिशतको उछाल देखियो ।  

बैंकिंग समूह पनि ७ प्रतिशतको हाराहारीमै बढ्न पुग्यो । विकास बैंक समूह करिब ६ प्रतिशत, होटल तथा टुरिजम करिब ६ प्रतिशत, जलविद्युत समूह करिब ७ प्रतिशत, जीवन बीमा समूह करिब ५ प्रतिशत, उत्पादन तथा प्रशोधन समूह ५ प्रतिशतभन्दा बढी माइक्रोफाइनान्स ४ प्रतिशत, निर्जीवन बीमा समूह करिब ४ प्रतिशत र अन्य समूह ५.५६ प्रतिशतले बढे ।

यो दिन २४ कम्पनीको सेयरमूल्य बढेर सर्किट लेभलमा पुग्यो ।