टक्सार पिखुला खोला हाइड्रोपावरको आइपीओमा आवेदन दिने आज अन्तिम दिन

काठमाण्डौ । टक्सार पिखुवा खोला हाइड्रोपावर लिमिटेडको आइपीओमा आवेदन दिने आज अन्तिम दिन रहेको छ । फागुन २७ गतेदेखि नेपाल सरकारबाट श्रम स्वीकृति लिएर वैदेशिक रोजगारमा गएका नेपालीहरुका लागि निष्कासन गरिएको आइपीओमा आजसम्म मात्रै आवेदन दिन सकिनेछ ।  

कम्पनीले प्रतिकित्ता १०० रुपैयाँका दरले आयोजना प्रभावितलाई १२ लाख कित्ता र वैदेशिक रोजगारीमा रहेका नेपालीलाई ३ लाख ३ हजार ६७ कित्ता आईपीओ निष्कासन गरिरहेकोमा वैदेशिक रोजगारीमा रहेकालाई निष्काशन गरेको आईपीओ आज साँझ बैंकिङ्ग समयपछि बन्द गर्न लागेको हो । 

कम्पनीले वैदेशिक रोजगारबाट मागभन्दा बढी मात्रामा आवेदन परिसकेकाले पूर्व निर्धारित समय बमोजिम आज निष्कासन बन्द गर्न लागिएको जानकारी दिएको छ । यता आयोजना प्रभावितले भने चैत ११ गतेसम्म आवेदन दिन सक्नेछन् ।

यो आईपीओमा आवेदन दिंदा न्यूनतम १० कित्ता र अधिकतम ५० हजार कित्तासम्म माग गर्न सकिने व्यवस्था गरिएको छ । कम्पनीको धितोपत्र निष्काशन तथा बिक्री प्रबन्धकमा प्रभु क्यापिटल लिमिटेड रहेको छ ।

वैदेशिक रोजगारमा गएका नेपालीहरुले सी–आस्वा सेवामा सहभागी बैंक तथा वित्तीय संस्था र तीनका तोकिएका शाखा कार्यालयहरुबाट सि–आस्वा प्रणालीमार्फत आवेदन दिन सक्नेछन् । साथै मेरो सेयरको वेबसाइट वा एपमार्फत पनि आवेदन दिन सकिनेछ ।