राष्ट्रिय परिचयपत्रको नम्बरबाट अब स्वास्थ्य बीमाको सुविधा

काठमाण्डौ । स्वास्थ्य बीमा बोर्डले स्वास्थ्य बीमा कार्यक्रमलाई डिजिटल प्रणालीमा विस्तार गर्ने तयारी थालेको छ ।

बोर्डले राष्ट्रिय परिचयपत्र प्रणालीसँग सहकार्य गरी स्वास्थ्य बीमालाई परिचयपत्र नम्बरमा आधारित बनाउने तयारी गरेको हो ।  

बोर्डले राष्ट्रिय परिचयपत्र तथा पञ्जीकरण  विभागसँग समझदारी गर्दै स्वास्थ्य बीमालाई क्रमशः राष्ट्रिय परिचयपत्र नम्बरमा आधारित बनाउने तयारी सुरु गरेको छ ।  

राष्ट्रिय परिचयपत्रमा रहेको विवरण र नम्बरलाई स्वास्थ्य बीमा प्रणालीमा आबद्ध गर्ने गरी दुई निकायबीच समझदारी–पत्रमा हस्ताक्षर भएको हो । सम्झौता पत्रमा राष्ट्रिय परिचयपत्र तथा पञ्जीकरण विभागका महानिर्देशक नमराज घिमिरे र स्वास्थ्य बीमा बोर्डका कार्यकारी निर्देशक डा. कृष्ण प्रसाद पौडेलले हस्ताक्षर गरेका छन् ।

सम्झौतापश्चात् चैत २५ गतेभित्र स्वास्थ्य बीमाको दर्ता तथा नवीकरण प्रक्रिया क्रमशः अनलाइनमार्फत गर्ने गृहकार्य भइरहेको बोर्डले जनाएको छ ।

एनआईडी प्रणालीसँग जोडिएपछि डाटा प्रमाणीकरण सहज हुने, दोहोरो दर्ता कम हुने र कार्डको दुरुपयोग घट्ने अपेक्षा गरिएको छ ।