अमेरिकाले इरानसँग युद्धविराम विस्तार गरेसँगै बढ्यो सुनको मूल्य, प्रतिऔंस कति पुग्यो ?

काठमाण्डौ । बुधबार अन्तर्राष्ट्रिय बजारमा सुनको मूल्यमा वृद्धि देखिएको छ । इरानसँगको युद्धविरामलाई विस्तार गर्ने अमेरिकी निर्णयपछि कच्चा तेलको मूल्य घटेको छ। यसले मुद्रास्फीति बढ्ने र उच्च ब्याजदर लामो समय कायम रहने चिन्तालाई केही हदसम्म कम गरेको छ।

जसका कारण आज सुनको मूल्य बढ्न पुगेको छ ।  

सुनको मूल्य १.१९ प्रतिशतले बढ्दै प्रतिऔंस ४ हजार ७५६ डलरमा पुगेको छ। मंगलबार भने सुनको मूल्य अप्रिल १३ यताकै न्यून स्तरमा झरेको थियो।

अमेरिकी राष्ट्रपति डोनाल्ड ट्रम्पले इरानसँगको युद्धविरामलाई अनिश्चितकालका लागि विस्तार गर्ने घोषणा गरेका छन्, जसले थप शान्ति वार्ताका लागि समय उपलब्ध गराउने बताइएको छ। यो युद्धविराम दुई साताअघि सुरु भएको थियो र यसको अवधि समाप्त हुन केही घण्टा मात्र बाँकी थियो।

तर ट्रम्पको घोषणा एकतर्फी भएको देखिएको छ, र इरान वा अमेरिकी सहयोगी इजरायलले यसलाई स्वीकार गर्नेबारे स्पष्टता आएको छैन।

विश्लेषकहरुका अनुसार, युद्धविराम विस्तारसँगै बजारमा तनाव कम भएको संकेत देखिन्छ। यदि युद्ध पुनः सुरु भयो भने डलर मजबुत हुनेछ, तेल र ब्याजदर बढ्नेछन्, जसले सुनको मूल्यमा दबाब सिर्जना गर्नेछ।

युद्धविराम विस्तारपछि सेयर बजारमा वृद्धि देखिएको छ भने डलर कमजोर भएको् छ र तेलको मूल्य घटेको छ।

विशेषज्ञहरूका अनुसार कच्चा तेलको मूल्य बढ्दा ढुवानी तथा उत्पादन खर्च बढेर मुद्रास्फीति बढ्ने सम्भावना हुन्छ। सुनलाई मुद्रास्फीतिको विरुद्ध सुरक्षित लगानी मानिए पनि उच्च ब्याजदरले ब्याज दिने सम्पत्तिहरूलाई आकर्षक बनाउँछ, जसले सुनको मागमा असर पार्न सक्छ।