युएईको आणविक ऊर्जा केन्द्रमा आक्रमण भएसँगै कच्चा तेलको मूल्यमा भारी वृद्धि, दुईसाताकै उच्च कायम

काठमाण्डौ । मध्यपूर्व क्षेत्रमा बढ्दो भू–राजनीतिक तनावका कारण अन्तर्राष्ट्रिय बजारमा कच्चा तेलको मूल्यमा उल्लेखनीय वृद्धि भएको छ। अमेरिका, इजरायल र इरानबीचको द्वन्द्व समाधानका प्रयास प्रभावहीन देखिएपछि विश्व बजारमा ऊर्जा आपूर्तिको सुरक्षाप्रति चिन्ता बढेको हो।

सोमबार ब्रेन्ट क्रुडको मूल्य १.८४ प्रतिशतले वृद्धि हुँदै प्रतिब्यारेल १११ डलर पुगेको छ । जुन पछिल्ला केही महिनाकै उच्च स्तर हो। त्यस्तै, डब्लुटीआई क्रुडको मूल्य पनि २.१८ प्रतिशतले बढेर प्रतिब्यारेल १०७.७ डलर पुगेको छ ।

विशेषज्ञहरूका अनुसार इरानसँगको तनाव लम्बिँदै गएमा खाडी क्षेत्रमा तेल आपूर्ति र ढुवानीमा अवरोध आउन सक्ने जोखिम बढ्नेछ। विशेषगरी विश्व ऊर्जा व्यापारका लागि अत्यन्त महत्वपूर्ण मानिने स्ट्रेट अफ हर्मुजमाथि हुने आक्रमण तथा कब्जाका घटनाले बजारमा थप अस्थिरता सिर्जना गरेको छ।

यसैबीच संयुक्त अरब इमिरेट्स (युएई) को बराकाह आणविक ऊर्जा केन्द्रमा ड्रोन आक्रमण भएको खबर सार्वजनिक भएपछि क्षेत्रीय सुरक्षा अवस्था थप जटिल बनेको छ। साउदी अरबले पनि आफ्नो हवाई क्षेत्रमा प्रवेश गरेका ड्रोनहरू अवरोध गरेको जनाएको छ।

अमेरिकी राष्ट्रपति डोनाल्ड ट्रम्पले इरानसम्बन्धी सम्भावित सैन्य विकल्पबारे राष्ट्रिय सुरक्षा सल्लाहकारहरूसँग छलफल गर्ने तयारी गरिरहेको समाचार सार्वजनिक भएपछि लगानीकर्ताहरू थप सतर्क बनेका छन्।

ऊर्जा बजार विश्लेषकहरूले लगातार बढ्दो तेल मूल्यले विश्वव्यापी मुद्रास्फीति बढाउने, ब्याजदर उच्च राख्न दबाब सिर्जना गर्ने तथा आर्थिक वृद्धिमा नकारात्मक असर पार्ने चेतावनी दिएका छन्।

यसैबीच अमेरिकी प्रशासनले भारतलगायत केही देशलाई रूसी समुद्री तेल खरिद गर्न दिइएको प्रतिबन्ध छुट समाप्त गरेपछि पनि विश्व बजारमा तेल आपूर्ति थप कडा हुन सक्ने अनुमान गरिएको छ।