अमेरिकामा ३० भारतीयसहित ५२ जना पक्राउ, देश निकाला गर्ने तयारी

काठमाण्डौ । अमेरिकी सीमा सुरक्षा निकायले ‘अपरेशन चेकमेट’ नामक विशेष अभियान अन्तर्गत एरिजोना राज्यको युमा सेक्टरमा अवैध रूपमा बसोबास गरिरहेका र ट्रक चलाइरहेका करिब ३० जना भारतीय नागरिकसहित ३६ जना सेमी–ट्रक चालकलाई पक्राउ गरेको जनाएको छ।

यूएस कस्टम्स एण्ड बॉर्डर प्रोटेक्शन(सीबीपी)का अनुसार, ११ देखि १५ मेसम्म सञ्चालन गरिएको उक्त अभियानका क्रममा कुल ५२ जनालाई नियन्त्रणमा लिइएको थियो, जसमा ३६ जना ट्रक चालक थिए। पक्राउ परेकामध्ये ३० जना भारतका नागरिक रहेको पुष्टि गरिएको छ भने बाँकी मेक्सिको, एल साल्भाडोर र रूसका नागरिक रहेको बताइएको छ।

अधिकारीहरूका अनुसार, पक्राउ परेकामध्ये केही व्यक्तिहरूको अमेरिकी विभिन्न राज्यहरू –क्यालिफोर्निया, न्यूयोर्क, वाशिङ्टन र भर्जिनियाबाट जारी गरिएको कमर्शियल ड्राइभिङ लाइसेन्स फेला परेको थियो भने केहीसँग कुनै लाइसेन्स नै थिएन।

सीबीपीले जारी गरेको विवरणअनुसार, धेरैजसो पक्राउ परेकासँग रोजगारी अनुमति सम्बन्धी कागजातहरू थिए, जुन अघिल्लो प्रशासनको समयमा जारी गरिएको भए पनि अहिले कानुनी रूपमा मान्य नभएको दाबी गरिएको छ।

अमेरिकी अधिकारीहरूले सबै पक्राउ परेकालाई संघीय अध्यागमन कानूनअनुसार प्रक्रिया अघि बढाइएको र उनीहरूलाई देश निकाला गरिने बताएका छन्।