गुगल अल्फाबेटले माग्यो ३.२ करोड लामखुट्टे मानिसहरुबीच खुला छाड्न अनुमति

​काठमाण्डौ । प्रविधि क्षेत्रको अग्रणी विश्वव्यापी कम्पनी गुगलको माउ संस्था अल्फाबेटले अमेरिकामा लामखुट्टेबाट सर्ने घातक रोगहरू नियन्त्रण गर्न एउटा नौलो र महत्त्वाकांक्षी कदम चालेको छ। कम्पनीले आफ्नो विशेष स्वास्थ्य प्रविधि परियोजना ‘प्रोजेक्ट डिबग’ अन्तर्गत प्रयोगशालामा विकसित गरिएका ३ करोड २० लाख विशेष लामखुट्टेहरू वातावरणमा छोड्न अमेरिकी सरकारसँग अनुमति मागेको छ।

​अमेरिकी वातावरण संरक्षण एजेन्सी (ईपीए) मा दर्ता गरिएको उक्त प्रस्ताव स्वीकृत भएमा आगामी दुई वर्षभित्र अमेरिकाका क्यालिफोर्निया र फ्लोरिडा राज्यहरूमा यी लामखुट्टेहरू चरणबद्ध रूपमा छोडिनेछन्।

​यो अभियानको मुख्य लक्ष्य अमेरिकामा तीव्र रूपमा फैलिरहेको वेस्ट नाइल भाइरस र सेन्ट लुइस इन्सेफलाइटिसु जस्ता खतरनाक रोगहरू नियन्त्रण गर्नु हो। यी रोगहरू क्युलेक्स प्रजातिका संक्रमित लामखुट्टेको टोकाइबाट मानिसमा सर्ने गर्दछन् र यसले स्नायु प्रणालीमा गम्भीर असर पुर्याउन सक्छ।

​गुगलका वैज्ञानिकहरूले यस प्रक्रियामा कुनै आनुवंशिक परिमार्जन वा रासायनिक कीटनाशकको प्रयोग गरेका छैनन्। बरु, यो पूर्ण रूपमा जैविक प्रविधिमा आधारित छ ।  

प्रयोगशालामा उत्पादित यी सबै भाले लामखुट्टेहरू हुन्, जसलाई वोल्बाचिया नामक प्राकृतिक ब्याक्टेरियाद्वारा संक्रमित गराइएको छ। ​जब यी ब्याक्टेरियायुक्त भाले लामखुट्टेहरूले प्रकृतिमा रहेका जंगली पोथी लामखुट्टेसँग संसर्ग गर्छन्, तब साइटोप्लाज्मिक इन्कम्प्याटिबिलिटीका कारण पोथीले पार्ने अण्डाहरू परिपक्व हुँदैनन् र तिनबाट बच्चा निस्कन पाउँदैनन्।

जैविक नियम अनुसार केवल पोथी लामखुट्टेले मात्र रगत चुस्ने गर्दछन्। गुगलले वातावरणमा छोड्ने सबै लामखुट्टे भाले भएकाले यिनीहरूले मानिसलाई टोक्दैनन् र मानव स्वास्थ्यमा कुनै खतरा हुँदैन। परिणामस्वरुप, केही समयमै लामखुट्टेको जनसंख्या स्वतः घट्दै जानेछ।