इरानसँगको सम्झौता अन्तिम नभएको ट्रम्पको चेतावनी, भन्छन्, ‘आवश्यक परे पुनः बमबारी हुन्छ’

काठमाण्डौ । फ्रान्समा आयोजित जी–७ शिखर सम्मेलनका क्रममा अमेरिकी राष्ट्रपति डोनाल्ड ट्रम्पले इरानसँग यस साता भएको युद्धविरामसम्बन्धी सम्झौता अन्तिम नभएको बताएका छन्। उनले सम्झौताका सर्तहरू आफूलाई स्वीकार्य नभए वा इरानले अपेक्षित व्यवहार नगरे अमेरिकाले पुनः सैन्य कारबाही गर्न सक्ने चेतावनी दिएका छन्।

ट्रम्पका अनुसार हालको समझदारीपत्र स्थायी शान्ति सम्झौता नभई आगामी वार्ताका लागि तयार गरिएको अन्तरिम ढाँचा मात्र हो। उनले आवश्यक परे इरानविरुद्ध पुनः बमबारी अभियान सञ्चालन गर्न सकिने बताएका छन्।

यसैबीच, फ्रान्सको इभियन बेन्समा सम्पन्न जी–७ सम्मेलनले इरानसँग भएको अन्तरिम सहमतिलाई स्वागत गर्दै मध्यपूर्वमा दीर्घकालीन शान्ति स्थापनाका लागि वार्तालाई निरन्तरता दिनुपर्नेमा जोड दिएको छ। जी–७ राष्ट्रहरूले इरानले कहिल्यै पनि आणविक हतियार प्राप्त गर्न नहुने आफ्नो साझा अडान पुनः दोहोर्याएका छन्।

अमेरिका र इरानबीच भएको समझदारीपत्रले हाल कायम रहेको युद्धविरामलाई थप ६० दिनका लागि विस्तार गर्ने र स्थायी शान्ति सम्झौताका लागि वार्ताको ढोका खोल्ने अपेक्षा गरिएको छ। यद्यपि सम्झौताको पूर्ण पाठ अझै सार्वजनिक गरिएको छैन।

युद्धविरामपछि पनि लेबनानको अवस्था प्रमुख चुनौतीका रूपमा रहेको छ। इरानले लेबनानमा समेत युद्ध अन्त्य हुनुपर्ने माग गरिरहेको छ भने इजरायलले आफ्नो सैन्य उपस्थिति कायम राख्ने संकेत दिएको छ। यस विषयमा अमेरिका र इजरायलबीच मतभेद देखिएको अन्तर्राष्ट्रिय सञ्चारमाध्यमहरूले उल्लेख गरेका छन्।