इरानको अस्तित्व नै समाप्त पारिदिने ट्रम्पको नयाँ चेतावनी

काठमाण्डौ । अमेरिकी राष्ट्रपति डोनाल्ड ट्रम्पले यदि युद्धविरामको उल्लङ्घन निरन्तर भइरह्यो भने इरानको अस्तित्व नै समाप्त हुन सक्ने चेतावनी दिएका छन् । यो चेतावनी अमेरिकाद्वारा इरानमाथि गरिएको पछिल्लो सैन्य आक्रमणपछि आएको हो।

अमेरिकी सेनाले पनामाको झण्डा बोकेको एक तेल ट्याङ्करलाई इरानले निशाना बनाएको दाबी गर्दै त्यसको प्रत्युत्तरस्वरूप इरानका विभिन्न सैन्य संरचनामाथि आक्रमण गरिएको जनाएको छ।

राष्ट्रपति ट्रम्पले आफ्नो ट्रुथ सोसल प्लेटफर्ममा लेखेका छन्, ‘युद्धविराम सम्झौताको पुनः उल्लङ्घन भएपछि अमेरिकी युद्धक विमानहरूले इरानका मिसाइल तथा ड्रोन भण्डारण केन्द्रहरू र रडार प्रणालीहरूलाई लक्षित गरी आक्रमण गरेका छन्।’

उनले थप लेखेका छन्, ‘उनीहरूले कहिल्यै पाठ सिक्न नसक्ने सम्भावना पूर्ण रूपमा रहेको छ। यस्तो अवस्था पनि आउन सक्छ, जहाँ हामी संयमित दृष्टिकोण अपनाउने अवस्थामा रहनेछैनौं र हामीले अत्यन्त सफलतापूर्वक सुरु गरेको अभियानलाई सैन्य शक्तिको प्रयोगमार्फत पूरा गर्न बाध्य हुन सक्छौं।’

ट्रम्पले अन्त्यमा भनेका छन्, ‘यदि त्यस्तो अवस्था आयो भने, इस्लामिक गणतन्त्र इरानको अस्तित्व रहनेछैन।’