इरानले अमेरिकी दूतहरूसँग भेट गर्न अस्विकार गरेसँगै कच्चा तेलको मूल्य बढ्यो

काठमाण्डौ । इरानले अमेरिकी दूतहरूसँग प्रत्यक्ष वार्ता नगर्ने निर्णय गरेपछि अन्तर्राष्ट्रिय बजारमा कच्चा तेलको मूल्य बुधबार बढेको छ। यस निर्णयले खाडी क्षेत्रमा जारी अस्थायी युद्धविराम थप कमजोर हुने आशंका बढाएको छ।

आज ब्रेन्ट क्रुडको मूल्य ०.४७ प्रतिशतले बढेर प्रतिब्यारेल ७३.२९ डलर पुगेको छ भने डब्लूटीआई क्रुडको मूल्यपनि ०.५२ प्रतिशतले बढ्दै प्रतिब्यारेल ६९.८६ डलर पुगेको छ ।

हालैको द्वन्द्वपछि मध्यपूर्वमा शान्ति वार्ताको प्रयास भइरहेका बेला इरान र कतारले अमेरिकी दूतसँग मध्यस्थमार्फत मात्र छलफल गर्ने बताएका छन्। यसले प्रत्यक्ष कूटनीतिक संवादको सम्भावना कमजोर बनाएको बजार विश्लेषकहरूको भनाइ छ।

यसैबीच, अमेरिकी उपराष्ट्रपति जेडी भान्सले स्ट्रेट अफ हर्मुजबाट जहाजहरू आवतजावतमा इरानलाई शुल्क लिन नदिइने चेतावनी दिएका छन्। यो जलमार्ग विश्वको करिब २० प्रतिशत तेल आपूर्तिको लागि अत्यन्त महत्वपूर्ण मानिन्छ।

गत त्रैमासिकमा भने तेल बजारमा तीव्र गिरावट देखिएको थियो। ब्रेन्ट तेल करिब ४५ डलरले घटेको थियो, जुन सन् २००८ पछिको सबैभन्दा ठूलो त्रैमासिक गिरावट हो। त्यस्तै, अमेरिकी तेल पनि २०२० यता सबैभन्दा ठूलो गिरावटमा पुगेको थियो।

विश्लेषकहरूले आगामी वर्षका लागि तेलको मूल्य पूर्वानुमान घटाएका छन्। हर्मुज जलमार्ग पुनः खुला भएपछि आपूर्ति जोखिम कम भएको र बजारमा आपूर्ति सहज भएको उनीहरूको मूल्यांकन छ।

अमेरिकामा कच्चा तेलको भण्डार पछिल्ला हप्तामा ६.१ मिलियन ब्यारेलले घटेको तथ्यांकले भने बजारलाई केही समर्थन गरेको देखिन्छ।